الماتى وبلىسىنىڭ ىلە اۋدانىندا جىلىنا 400 توننا بالىق وندىرەتىن «باقىت» كاسىپورنى ىسكە قوسىلدى.
ينۆەستيتسيا قۇنى – 500 ملن تەڭگە. مۇحامەتجان تۇيمەباەۆ اۋىلىندا اشىلعان شارۋاشىلىقتا بالىق وسىرۋمەن قاتار، ول ءۇشىن قاجەتتى تور قورشاۋ مەن ونىڭ بولشەكتەرى جاسالادى. كاسىپورىن – اتالعان قۇرال-جابدىقتاردى شىعاراتىن ەلىمىزدەگى العاشقى ءوندىرىس وشاعى.
سالتاناتتى راسىمگە الماتى وبلىسى اكىمىنىڭ ورىنباسارى باقىتنۇر باقىتۇلى قاتىسىپ، جاڭا كاسىپورىننىڭ اشىلۋىمەن قۇتتىقتادى. 
«بۇل جوبا – وڭىرىمىزدەگى بالىق شارۋاشىلىعىن دامىتۋعا، وتاندىق ءوندىرىستى قولداۋعا جانە اۋىل ەكونوميكاسىن نىعايتۋعا باعىتتالعان ماڭىزدى باستاما. بۇگىندە كاسىپورىن ونىمدەرى الماتى وبلىسىنان بولەك، شىعىس قازاقستان، پاۆلودار، تۇركىستان، باتىس قازاقستان مەن جەتىسۋ وبلىسىنىڭ بالىق شارۋاشىلىقتارىنا جەتكىزىلىپ، پايدالانىلۋدا. بۇل وتاندىق جابدىقتارعا سۇرانىستىڭ جوعارى ەكەنىن جانە كاسىپورىننىڭ ەلىمىزدەگى بالىق شارۋاشىلىعىن دامىتۋعا ەلەۋلى ۇلەس قوسىپ وتىرعانىن كورسەتەدى. «باقىت» شارۋاشىلىعى الداعى ۋاقىتتا ءوندىرىسىن كەڭەيتىپ، حالىقتى ساپالى ونىممەن قامتاماسىز ەتۋگە سەپتىگىن تيگىزەدى دەپ سەنەمىن»، – دەدى باقىتنۇر باقىتۇلى. سونداي-اق ول الماتى وبلىسىندا بۇل سالانى دامىتۋعا ەرەكشە كوڭىل ءبولىنىپ جاتقانىن جەتكىزدى. ايتۋىنشا، بيىل وڭىردە بالىق شارۋاشىلىعىن دامىتۋعا 1 ملرد تەڭگە سۋبسيديا ءبولىندى. بۇگىندە وبلىستا 53 بالىق وسىرەتىن شارۋاشىلىق جۇمىس ىستەيدى. بىلتىر وڭىردە 5,8 مىڭ توننا بالىق ءوندىرىلدى. بيىل ونىڭ كولەمىن 10 مىڭ تونناعا، ال 2030 جىلعا قاراي 20 مىڭ تونناعا جەتكىزۋ جوسپارلانىپ وتىر. بۇگىن اشىلعان «باقىت» شارۋاقوجالىعى وسى ماقساتتى جۇزەگە اسىرۋعا، اۋىلدا كاسىپكەرلىكتى دامىتىپ، تۇرعىنداردى جۇمىسپەن قامتۋعا مۇمكىندىك بەرەدى.
كاسىپورىندا بالىقتار كولدىڭ ورتاسىندا ارنايى تور قورشاۋدا وسىرىلەدى. شارۋاقوجالىق باسشىسى باقىت الدىباەۆتىڭ ايتۋىنشا، اۋەلى سالماعى 200 گرامم شاباق سۋعا جىبەرىلىپ، 3 ايدىڭ ىشىندە 2,5-3 كەلى تارتاتىن بالىققا اينالادى. بالىقتارعا ەكولوگيالىق تازا جەم بەرىلەدى. كاسىپورىن قازىردىڭ وزىندە 100 توننادان استام ءونىم الىپ ۇلگەردى. ول ءۇشىن 12 تور قورشاۋ قولدانىلدى. كەلەسى جىلى بالىق كولەمىن 400 تونناعا جەتكىزىپ، قورشاۋدى 30-عا كوبەيتۋ جوسپارلانىپ وتىر. مۇندا كاسىبي مامانداردان قۇرالعان 15 ادام جۇمىس ىستەيدى. ولار بالىقتىڭ جاعدايىن قاداعالايدى. قازىرگى تاڭدا شارۋاشىلىققا قاجەت قورشاۋ كاسىپورىننىڭ وزىندە جاسالادى. ال تور شەتەلدەن يمپورتتالادى. بولاشاقتا تور توقيتىن تسەح اشىپ، ءوندىرىس ورنىن كوبەيتۋ جوسپارلانۋدا. سول كەزدە جۇمىسشىلار سانى 45-50 ادامعا كوبەيەدى.
كاسىپورىننىڭ اشىلعانىنا م.تۇيمەباەۆ اۋىلىنىڭ تۇرعىندارى ءدان ريزا. سولاردىڭ ءبىرى – امزە يساەۆ.
«اۋىلىمىزدا وسىنداي يگى جوبانىڭ ىسكە اسىرىلىپ جاتقانى –قۇپتارلىق ءىس. بۇل ەلدىمەكەن تىرشىلىگىنە جان ءبىتىرىپ، جاڭا مۇمكىندىكتەر سىيلايدى. اۋىلىمىزداعى كولدە كەزىندە بالىق شارۋاشىلىعى جاقسى دامىعان. بىراق كەيىن قيىن كەزەڭدەردە تۇرالاپ قالدى. بۇل باستامانىڭ قايتا جاندانىپ جاتقانىنا قۋانىشتىمىن»، – دەدى تۇرعىن.
