الماتىدا جەدەل جاردەم كولىگىنىڭ قاتىسۋىمەن جول-كولىك وقيعاسى بولدى، دەپ حابارلايدى «ادىرنا» ءتىلشىسى.
قالالىق پوليتسيا دەپارتامەنتىنىڭ مالىمەتىنشە، وقيعا 3 جەلتوقسان كۇنى الاتاۋ اۋدانىندا تۇنگى ساعات 00:40-تا بولعان.
«جەدەل جاردەم بريگاداسىنىڭ جۇرگىزۋشىسى ساين كوشەسىمەن سولتۇستىك باعىتقا قوزعالىپ كەلە جاتقان كەزدە بۇرىلۋعا ارەكەت جاساعان ساتتە، وڭتۇستىك باعىتتا كەلە جاتقان Kia اۆتوكولىگىمەن سوقتىعىستى»،-دەلىنگەن حابارلامادا.
جول اپاتى سالدارىنان ەكى كولىكتىڭ دە جۇرگىزۋشىلەرى مەن جولاۋشىلارى زارداپ شەككەن.
«وكىنىشكە قاراي، 2002 جىلى تۋعان جەدەل جاردەم كولىگىنىڭ جولاۋشىسى بىرنەشە ساعاتتان كەيىن العان جاراقاتتارى سالدارىنان كوز جۇمدى. ادام ولىمىنە اكەلگەن بۇل جول اپاتى بويىنشا دپ-نىڭ تەرگەۋ باسقارماسى قىلمىستىق ءىس قوزعادى»، – دەدى پوليتسيا وكىلدەرى.
ەسكە سالايىق، بۇعان دەيىن استانادا 23 جاستاعى فەلدشەر ۇلدانا مىرزۋان قايتىس بولعان ەدى.
