1 قاراشادا اقش-تىڭ فەدەرالدىق سوتى پرەزيدەنت دونالد ترامپ اكىمشىلىگىنىڭ الياسكا شتاتىنداعى سەنات سايلاۋىنىڭ قورىتىندىسىن رەسمي بەكىتۋگە كەدەرگى كەلتىرۋ تۋرالى تالاپ-ارىزىن قابىلدامادى، دەپ حابارلايدى «ادىرنا» ءتىلشىسى DW-گە سىلتەمە جاساپ.
اكىمشىلىك بۇل تالاپتى قازىرگى رەسپۋبليكالىق سەناتور دەن سالليۆان جەڭىلىپ قالعان جاعدايدا ناتيجەلەردى بەكىتۋدى توقتاتۋ ماقساتىندا بەرگەن. سوت اقش ادىلەت مينيسترلىگىنىڭ مۇنداي تالاپ قويۋعا جەتكىلىكتى قۇقىقتىق نەگىزى جوق دەگەن قورىتىندىعا كەلگەن.
ترامپ اكىمشىلىگىنىڭ پايىمداۋىنشا، سايلاۋعا سەناتورمەن تەگى بىردەي، زەينەتكە شىققان مۇعالىم كىشى دەنيەل دج. سالليۆان ەسىمدى ازاماتتىڭ قاتىسۋى سايلاۋشىلاردى شاتاستىرىپ، داۋىس بەرۋ ناتيجەسىنە اسەر ەتۋى مۇمكىن. وسىعان بايلانىستى ادىلەت مينيسترلىگى دەموكراتيالىق پارتيانىڭ وكىلى مەري پەلتولا جەڭىسكە جەتكەن جاعدايدا سايلاۋ قورىتىندىسىن رەسمي بەكىتپەۋدى تالاپ ەتكەن. سونداي-اق تەگى بىردەي ەكىنشى سالليۆانعا داۋىس بەرگەن ازاماتتاردىڭ شىن مانىندە قازىرگى سەناتوردى قولداۋدى كوزدەگەن-كوزدەمەگەنىن انىقتاۋدى سۇراعان.
فەدەرالدىق سۋديا شەرون گليسون 20 بەتتىك قاۋلىسىندا اقش بيلىگى داۋىس بەرۋ قۇپياسىن بۇزباي، مۇنداي تەكسەرۋدى جۇزەگە اسىرۋدىڭ ناقتى تەتىگىن ۇسىنا الماعانىن اتاپ وتكەن.
سوت داۋىنا The New York Times باسىلىمىندا جاريالانعان اقپارات سەبەپ بولعان. وندا مەري پەلتولامەن بايلانىسى بار ساياسي كەڭەسشىلەر سايلاۋعا سەناتورمەن تەگى بىردەي كانديداتتى قاتىستىرۋعا ىقپال ەتۋى مۇمكىن ەكەنى ايتىلعان. الايدا پەلتولا بۇل ايىپتاۋلاردى جوققا شىعارعان.
سوت شەشىمىنەن كەيىن اقش ادىلەت مينيسترلىگى اپەللياتسيالىق شاعىم تۇسىرۋگە نيەتتى ەكەنىن مالىمدەدى. ال دونالد ترامپ Truth Social الەۋمەتتىك جەلىسىندەگى پاراقشاسىندا «جالعان كىشى دەنيەل دج. سالليۆان جوعالىپ كەتتى» دەپ جازىپ، ساياسي قارسىلاستارىن تاعى دا سىنعا الدى.
اقش كونگرەسىنىڭ وكىلدەر پالاتاسى مەن سەناتىنا ارالىق سايلاۋ 3 قاراشادا وتەدى. الياسكاداعى سايلاۋ جوعارعى پالاتاداعى باقىلاۋ ءۇشىن كۇرەستەگى ماڭىزدى باسەكەلەردىڭ ءبىرى سانالادى.
