پاۆلوداردا الەۋمەتتىك جەلىدە قازاق حالقىن قورلاپ، رەسەي پرەزيدەنتى ۆلاديمير پۋتيننەن قازاقستانعا اسكەر كىرگىزۋدى سۇراعان ايەل ۇستالدى. بۇل تۋرالى ۇلتتىق قاۋىپسىزدىك كوميتەتى ايتتى، دەپ حابارلايدى «ادىرنا» ءتىلشىسى.
«28 قازاندا سەپاراتيستىك سيپاتتاعى ۆيدەو جاريالادى دەگەن كۇدىككە ىلىنگەن جەرگىلىكتى تۇرعىن ۇستالدى. قازىر سوتقا دەيىنگى تەرگەۋ باستالدى. ول بۇعان دەيىن ەسىرتكى زاتتارىن وتكىزگەنى ءۇشىن سوتتالعان»، – دەلىنگەن حابارلامادا.
بۇعان دەيىن الەۋمەتتىك جەلىلەردە ءوزىن ولگا مۇحامەتجانوۆا دەپ تانىستىرعان ايەلدىڭ ۆيدەوسى تاراعان ەدى. ول ەكىباستۇز قالاسىندا دۇنيەگە كەلگەنىن ايتقان.
ءوز ۇندەۋىندە ايەل رەسەي پرەزيدەنتى ۆلاديمير پۋتيننەن قازاقستانعا رەسەي اسكەرىن كىرگىزۋدى سۇراعان. سونىمەن قاتار قازاق حالقىنا ءتىل تيگىزىپ، قازاقستاننىڭ بىرقاتار قالاسى رەسەيگە تيەسىلى دەگەن مالىمدەمە جاساعان. بەينەجازبا قوعامدا ۇلكەن رەزونانس تۋدىرىپ، قۇقىق قورعاۋ ورگاندارىنىڭ نازارىن اۋدارعان بولاتىن.
