ازەربايجان ۇلتتىق عىلىم اكادەمياسى (ۇعا) پرەزيديۋمىنىڭ وتىرىسىندا راميز مەحتيەۆتى اكادەميا مۇشەلىگىنەن شىعارۋ ماسەلەسى قارالدى. بۇل تۋرالى اپا اگەنتتىگى جازدى، دەپ حابارلايدى «ادىرنا» ءتىلشىسى.
اكادەميا مالىمەتىنشە، 2023 جىلعى 23 قاراشادا ۇعا-نىڭ جالپى جينالىسىندا بەكىتىلگەن اكادەميا مۇشەلەرىن سايلاۋ، ولاردىڭ قۇقىقتارى مەن مىندەتتەرى تۋرالى ەرەجەنىڭ 3.6-تارماعىنا سايكەس، ەگەر اكادەميا مۇشەسى ەل مەن اكادەميانىڭ بەدەلىنە نۇقسان كەلتىرەتىن ارەكەتتەر جاساسا نەمەسە ءوز مىندەتتەرىن ورىنداماسا، ونى ۇعا قۇرامىنان شىعارۋ ماسەلەسى پرەزيديۋم وتىرىسىندا قارالادى. ءتيىستى شەشىم قابىلدانعاننان كەيىن ماسەلە ۇعا-نىڭ جالپى جينالىسىنىڭ بەكىتۋىنە ۇسىنىلادى.
اكادەميا پرەزيدەنتى يسا گابيببەيلي وتىرىستى اشۋ بارىسىندا راميز مەحتيەۆتىڭ ەلدىڭ بەدەلىنە نۇقسان كەلتىرەتىن قىلمىستىق ارەكەتتەرگە بارعانىن جانە اكادەميا مۇشەلەرىنە قويىلاتىن جارعىلىق تالاپتاردى بۇزعانىن مالىمدەدى. سونداي-اق باكۋ قالاسىنىڭ اۋىر قىلمىستار جونىندەگى سوتىنىڭ ۇكىمىمەن ونىڭ 14 جىلعا باس بوستاندىعىنان ايىرىلعانى ايتىلدى.
ونىڭ سوزىنشە، تاۋەلسىز مەملەكەتتىڭ كونستيتۋتسيالىق قۇرىلىسىن وزگەرتۋ جوسپارىن كوزدەگەن راميز مەحتيەۆتىڭ ارەكەتتەرى – ەلدىڭ تاۋەلسىز مەملەكەتتىلىگىنە وپاسىزدىق جاساۋ. بۇل — اكادەميا مۇشەسىنىڭ مارتەبەسىنە قايشى كەلەتىن، عالىمنىڭ بەدەلىنە نۇقسان كەلتىرەتىن كەشىرىلمەس ارەكەتتەر.
«مەملەكەتكە وپاسىزدىق جاساپ، سوتتىڭ قاتاڭ جازاسىنا كەسىلگەن راميز مەحتيەۆ ۇلتتىق عىلىم اكادەمياسىنىڭ مۇشەسى بولىپ قالا المايدى»، — دەپ اتاپ ءوتتى يسا گابيببەيلي.
وسىعان بايلانىستى راميز مەحتيەۆتىڭ ەل ازاماتى مەن اكادەميا مۇشەسىنە لايىق ەمەس قىلمىستىق ارەكەتتەرى جانە باكۋ قالاسىنىڭ اۋىر قىلمىستار جونىندەگى سوتىنىڭ ونى 14 جىلعا باس بوستاندىعىنان ايىرۋ تۋرالى ۇكىمى ەسكەرىلىپ، ونى ۇعا مۇشەلىگىنەن شىعارۋ ورىندى دەپ تانىلدى. ماسەلە پرەزيديۋم مۇشەلەرىنىڭ تالقىلاۋىنا ۇسىنىلدى.
ۇعا پرەزيديۋمىنىڭ مۇشەلەرى تاۋەلسىز مەملەكەتكە وپاسىزدىق جاساعان، كونستيتۋتسيالىق قۇرىلىستى وزگەرتۋگە ارەكەتتەنگەن جانە قىزمەتتىك وكىلەتتىگىن اسىرا پايدالانىپ، زاڭسىز بايلىق جيناعان راميز مەحتيەۆتىڭ ارەكەتتەرىن قاتاڭ ايىپتادى.
وتىرىس بارىسىندا راميز مەحتيەۆتى اكادەميا مۇشەلىگىنەن شىعارۋ ماسەلەسى داۋىسقا سالىنىپ، قولداۋ تاپقان.
اكادەميانىڭ مالىمەتىنشە، قابىلدانعان شەشىم ۇعا مۇشەلەرىن سايلاۋ، ولاردىڭ قۇقىقتارى مەن مىندەتتەرى تۋرالى ەرەجەگە سايكەس اكادەميانىڭ جالپى جينالىسىندا بەكىتىلۋى ءتيىس.
وتىرىس سوڭىندا ۇعا پرەزيديۋمى اكادەميانىڭ جالپى جينالىسىن 30 قازاندا شاقىرۋ تۋرالى شەشىم قابىلدادى.
ايتا كەتەيىك، باكۋ قالاسىنىڭ اۋىر قىلمىستار جونىندەگى سوتىنىڭ ۇكىمىمەن ازەربايجان پرەزيدەنتى اكىمشىلىگىنىڭ بۇرىنعى باسشىسى راميز مەحتيەۆ 14 جىلعا باس بوستاندىعىنان ايىرىلعان.
الايدا سوت ۇكىمىندە ونىڭ جاسى مەن دەنساۋلىق جاعدايى ەسكەرىلىپ، قىلمىستىق كودەكستىڭ 70-بابىنا سايكەس تاعايىندالعان جازا شارتتى دەپ تانىلعان.
سونداي-اق سوت ۇكىمىندە راميز مەحتيەۆتى مەملەكەتتىك ناگرادالارىنان ايىرۋ ماسەلەسىن قاراۋ ءۇشىن ءتيىستى ۇسىنىس ەنگىزۋ كوزدەلگەن.
بۇدان بولەك، ونىڭ مۇلكىن مەملەكەت پايداسىنا تاركىلەۋ تۋرالى شەشىم قابىلدانعان.
ەسكە سالايىق، 2025 جىلعى قازاندا ازەربايجان مەملەكەتتىك قاۋىپسىزدىك قىزمەتى راميز مەحتيەۆكە قاتىستى قىلمىستىق ءىس قوزعاعان. وعان قىلمىستىق كودەكستىڭ 193-1.3.2-بابى (قىلمىستىق جولمەن الىنعان مۇلىكتى زاڭداستىرۋ), 274-بابى (مەملەكەتكە وپاسىزدىق جاساۋ) جانە 278.1-بابى (بيلىكتى كۇشپەن باسىپ الۋعا نەمەسە مەملەكەتتىڭ كونستيتۋتسيالىق قۇرىلىسىن كۇشپەن وزگەرتۋگە باعىتتالعان ارەكەتتەر) بويىنشا ايىپ تاعىلعان.
