قازاقستاندىق سپورتشىلار الەم چەمپيوناتىندا تاريحي جۇلدەگە قول جەتكىزدى، دەپ حابارلايدى “ادىرنا” ءتىلشىسى.
ازەربايجان استاناسى باكۋدە ءوتىپ جاتقان نىسانا كوزدەۋدەن 53-ءشى الەم چەمپيوناتىندا قازاقستان قورجىنىنا 2 مەدال ءتۇستى.
ايەلدەر اراسىندا 10 مەتردەن جىلجىمالى نىسانا كوزدەۋدءىڭ فينالىنا ەكى قازاقستاندىق – زۋحرا يرنازاروۆا مەن الەكساندرا سادۋاكاسوۆا شىعىپ، باس جۇلدەنى ساراپقا سالدى. تارتىستى وتكەن اقتىق سىندا زۋحرا وتانداسى الەكساندرادان 6-3 ەسەبىمەن باسىم ءتۇسىپ، الەم چەمپيونى اتاندى.
ال قولا ۋكراينالىق گالينا اۆرامەنكوعا بۇيىردى.
بۇعان دەيىن ەرەسەكتەر اراسىندا قازاقستاندىق مەرگەندەر الەم چەمپيوناتىندا جۇلدە الماعان. بارلىق جەتىستىك جاسوسپىرىمدەر مەن جاستار دەڭگەيىندە تىركەلگەن. ال سپورتشى قىزدار بىردەن قوس مەدالدى قانجىعاعا بايلادى.
باكۋدە كءۇمىس جۇلدەگە يە بولعان الەكساندرا سادۋاكاسوۆا بىلتىر فرانتسيادا وتكەن جاستار اراسىنداعى الەم چەمپيوناتىندا توپ جارعانىن ەسكە سالا كەتەيىك.
«بۇگىنگى كۇن قاربالاسقا تولى بولدى. ءبىز وسى چەمپيوناتقا ۇزاق ۋاقىت دايىندالدىق. ءار وعىمدى الدىڭعىسىنان جاقسى، ءدال اتۋعا تىرىستىم. بار تاكتيكام وسى بولدى. جارىسقا دەيىنگى جاتتىعۋلاردىڭ ارقاسىندا وسى جۇلدەگە قول جەتكىزدىم»،-دەدى زۋحرا سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.
قازىر قازاقستان قۇراماسىنىڭ ەنشىسىندە 3 جۇلدە بار. بىرنەشە كۇن بۇرىن ستەند اتۋدىڭ تراپ باعدارلاماداسىندا ماريا دميتريەنكو مەن دانيل پوچيۆالوۆ ۇزدىك ۇشتىكتى تۇيىندەگەنىن ەسكە سالامىز. باكۋداعى دودا 1 قىركۇيەكتە مارەسىنە جەتەدى.
