باۋىرلاس ازەربايجان ەلىنىڭ استاناسى – باكۋ قالاسىندا، ۇلتتىق ۇەۇ فورۋمىنىڭ شتاب-پاتەرىندە دۇنيەجۇزىلىك جاس تۇركى جازۋشىلار وداعى مەن «وڭىرلىك قۇقىقتىق جانە ەكونوميكالىق اعارتۋشىلىق» قوعامدىق بىرلەستىگىنىڭ ۇيىمداستىرۋىمەن اقىن، قازاقستان جازۋشىلار وداعىنىڭ مۇشەسى، حالىقارالىق الاش ادەبي سىيلىعىنىڭ لاۋرەاتى سايات كامشىگەردىڭ ازەربايجان تىلىنە اۋدارىلىپ شىققان «Qarabaq» پوەما-كىتابىنىڭ تۇساۋكەسەرى وتتى.
ء ىس-شارا قازاقستان مەن ازەربايجان اراسىنداعى دوستىق-باۋىرلاستىق قارىم-قاتىناستىڭ، سونداي-اق تۇركى الەمىندەگى ورتاق ادەبي-مادەني پلاتفورمالاردىڭ دامۋى تۇرعىسىنان ماڭىزدى وقيعا رەتىندە باعالاندى.
تۇساۋكەسەردە كىرىسپە ءسوز سويلەگەن ازەربايجان اقىنى اكبار قوشالى «Qarabaq» كىتابىنىڭ يدەيالىق-ەستەتيكالىق ەرەكشەلىكتەرى، اۆتوردىڭ شىعارماشىلىق باعىتى جانە قاراباق تاقىرىبىنىڭ قازىرگى تۇركى ادەبيەتىندە العان جاڭا مازمۇندىق قىرلارى تۋرالى كەڭىنەن مالىمەت بەردى. ول «Qarabaq» پوەماسىن تۇركى الەمىنىڭ ورتاق قۇندىلىعىنىڭ كوركەم كورىنىسى رەتىندە باعالادى. اكبار قوشالى قاراباقتىڭ تۇركى رۋحىنىڭ، ورتاق تاريح پەن تاعدىردىڭ سيمۆولىنا اينالعانىن اتاپ ءوتتى:
اۆتور سايات كامشىگەر ءوز سوزىندە «Qarabaq» پوەماسىنىڭ تەك ادەبي جوبا عانا ەمەس، سونىمەن بىرگە رۋحاني بورىشتىڭ، باۋىرلاستىق سەزىمنىڭ، دوستىقتىڭ كورىنىسى ەكەنىن ايتتى. ول قاراباق تاقىرىبىنىڭ قازاق وقىرمانى ءۇشىن دە جات ەمەس ەكەنىن ايتىپ، وسى كىتاپ ارقىلى ازەربايجان شىندىعىن، قاراباقتىڭ قاسىرەتىن، قاھارماندىقتى، جەڭىس تاريحىن قازاق ەلىنە كوركەم تۋىندى ارقىلى جەتكىزۋدى ماقسات ەتكەنىن ءبىلدىردى.
تۇساۋكەسەردە ءسوز سويلەگەن قازاقستان رەسپۋبليكاسىنىڭ ازەربايجانداعى توتەنشە جانە وكىلەتتى ەلشىسى ءالىم بايەل ەكى ەل اراسىنداعى قاتىناستاردىڭ ستراتەگيالىق سەرىكتەستىك دەڭگەيىندە دامىپ كەلە جاتقانىن ايتتى. ول مادەني جانە ادەبي جوبالاردىڭ دوستىق-باۋىرلاستىق قاتىناستى ودان ءارى نىعايتاتىنىن ايتتى. ەلشى مۇنداي شىعارمالاردىڭ حالىقتار اراسىنداعى رۋحاني جاقىنداسۋدىڭ ەڭ ءتيىمدى قۇرالدارىنىڭ ءبىرى ەكەنىن ەرەكشە اتاپ ءوتتى. ەلشىنىڭ باۋىرلاس ەلدىڭ، باسقىنشىلىقتان ازات ەتىلگەن ازەربايجان اۋماعىندا جۇرگىزىلىپ جاتقان قۇرىلىس، قايتا قالپىنا كەلتىرۋ جۇمىستارىنا كورسەتىلگەن قولداۋ تۋرالى ايتقانى وقىرمان تاراپىنان زور قوشەمەتپەن قابىلداندى.
حالىقارالىق تۇركى مادەنيەتى جانە مۇراسى قورىنىڭ اپپارات باسشىسى، تاريح عىلىمدارىنىڭ دوكتورى فاحري ۆالەحوعلۋ ءوز سوزىندە قاراباق تاقىرىبىنىڭ بۇگىندە جالپى تۇركىلىك قۇندىلىققا اينالعانىن اتاپ ءوتىپ، سايات قامشىگەردىڭ «Qarabaq» پوەماسى ورتاق مادەني مۇرانى ساقتاۋ جانە ناسيحاتتاۋ تۇرعىسىنان ماڭىزدى ەكەنىن ايتتى.
مەملەكەتتىك قولداۋ اگەنتتىگىنىڭ باقىلاۋ كەڭەسىنىڭ توراعاسى، پروفەسسور فۋاد مامەدوۆ ءوز سوزىندە ازاماتتىق قوعام ينستيتۋتتارىنىڭ وسىنداي باستامالار ارقىلى ۇلتتىق-رۋحاني قۇندىلىقتاردى ساقتاۋعا جانە حالىقارالىق مادەني ينتەگراتسياعا ەلەۋلى ۇلەس قوسىپ وتىرعانىن جەتكىزدى.
وسىناۋ حالىقارالىق ءىس-شاراعا قاتىسىپ، ءسوز العاندار كىتاپتىڭ ماڭىزىن ءتۇرلى قىرىنان باعالادى. «وڭىرلىك قۇقىقتىق جانە ەكونوميكالىق اعارتۋشىلىق» قوعامدىق بىرلەستىگىنىڭ ۇيلەستىرۋشىسى نيلۋفەر ءلاتيف، اقىن، دۇنيەجۇزىلىك جاس تۇركى جازۋشىلار وداعىنىڭ توراعاسى ينتيكام ياشار، ماتەريالدىق ەمەس مادەني مۇرانى دامىتۋدى قولداۋ قوعامدىق بىرلەستىگىنىڭ توراعا ورىنباسارى ايدان ياشار ءوز سوزدەرىندە بۇل شارانىڭ ۇيىمداستىرۋشىلىق تۇرعىدان ماڭىزىن اتاپ ءوتىپ، مۇنداي جوبالاردىڭ تۇراقتى سيپات الۋ قاجەتتىگىن باسا ايتتى.
تۇركولوگ-عالىم، پروفەسسور نيزامي تاگيسوي اقىن سايات قامشىگەردىڭ بۇل پوەما-كىتابىن تۇركى پوەتيكالىق ويىنىڭ زاماناۋي كورىنىسى رەتىندە باعالاپ، قاراباق تاقىرىبىنىڭ قازاق ادەبيەتىندە كورىنىس تابۋىن ماڭىزدى ادەبي وقيعا رەتىندە سيپاتتادى.
قوعام قايراتكەرلەرى، عالىمدار مەن جازۋشىلار – ازەربايجان ادەبيەت قورىنىڭ ديرەكتورى، جازۋشى-پۋبليتسيست ۆاريس يولچيەۆ، پروفەسسور، اقىن ءراسميا سابىر، باكۋدەگى تۇرىك ساۋدا ورتالىعىنىڭ باسشىسى يىلماز وكۋكلۋ، دياسپورا جەتەكشىسى تەرلان قاسىموۆ، «Bayraqdar Media» سايتى باس رەداكتورىنىڭ ورىنباسارى، ازەربايجاننىڭ ەڭبەك سىڭىرگەن ءجۋرناليستى نادير يسمايىلوۆ، ازەربايجان ۇلتتىق عىلىم اكادەمياسى فولكلور ينستيتۋتىنىڭ حالىقارالىق بايلانىستار ءبولىمىنىڭ مەڭگەرۋشىسى ءالي شاميل، «قايتۋ جانە جاڭعىرۋ ءۇشىن» قوعامدىق بىرلەستىگىنىڭ توراعاسى ۆۋگار گاديروۆ، «Dirçəliş» جاستاردىڭ پسيحولوگيالىق-رەابيليتاتسيالىق ورتالىعىنىڭ جەتەكشىسى يسلام باحشاليەۆ، تانىمال جۋرناليست ەتيبار جابرايلوعلى، جازۋشى ەتيبار مۋرادحانلى، ازەربايجان ۇعا ن.گانجاۋي اتىنداعى ادەبيەت ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ كانديداتى مارزيا نادجاف، ادەبيەت ينستيتۋتىنىڭ اعا عىلىمي قىزمەتكەرى، فيلولوگيا عىلىمدارىنىڭ كانديداتى ايتەن گۋربان، «Çağrı.az» سايتىنىڭ باس رەداكتورى مۋباريز يۋنۋس، «حازار» ۋنيۆەرسيتەتىنىڭ وقىتۋشىسى، عالىم اينۇر گازانفارقىزى، جازۋشى ءلاتيفا ورۋدج ءوز سوزدەرىندە كىتاپتىڭ ادەبي-ەستەتيكالىق قۇندىلىعىن، يدەيالىق جۇگىن جانە تۇركى الەمىندە ورتاق رۋحاني پلاتفورما قالىپتاستىرۋعا قوسقان ۇلەسىن ەرەكشە اتاپ ءوتتى.
ء ىس-شارا سوڭىندا سايات قامشىگەرگە ازەربايجان رەسپۋبليكاسى ميللي ءماجىلىسىنىڭ قوعامدىق بىرلەستىكتەر جانە ءدىني ۇيىمدار كوميتەتىنىڭ توراعاسى دوكتور فازيل مۇستافانىڭ اتىنان العىس حات تابىستالدى. باسقا دا ۇيىمدار تاراپىنان اۆتور قۇرمەت گراموتالارىمەن ماراپاتتالدى.
دۇنيەجۇزىلىك ادەبيەت جانە ونەر اكادەمياسىنىڭ پرەزيدەنتى اتانتاي اكباروۆتىڭ قازاق اقىنى سايات قامشىگەردىڭ پوەماسىن اۋدارىپ، كىتاپ ەتىپ شىعارعان ازەربايجاندىق قالامگەرلەر اكبار قوشالى، ەلشان ءازيم، ءراسميا سابىر، ەتيبار مۇرادحانلى، ينتيكام ياشارعا، سونداي-اق «Qarabaq» كىتابىنىڭ العىسوزىن جازعان ارزۋ باگيروۆاعا، ۇيلەستىرۋشىسى نيلۋفەر لاتيفكە جانە رەتسەنزەنتى تاريەل احمەدوۆكە جولداعان العىس حاتتارىن قازاقستاننىڭ ازەربايجانداعى ەلشىسى ءالىم بايەل، حالىقارالىق تۇركى مادەنيەتى جانە مۇراسى قورىنىڭ اپپارات باسشىسى فاحري ۆالەحوعلۋ، پروفەسسور فۋاد مامەدوۆ جانە سايات قامشىگەر يەلەرىنە تابىستادى.
«Qarabaq» پوەما-كىتابىنىڭ تۇساۋكەسەرى قىزىقتى پىكىرلەر مەن جۇرەكجاردى سوزدەرگە تولى بولدى. ءىس-شارا قاتىسۋشىلار اراسىندا پىكىر الماسۋ جانە ەستەلىك سۋرەتكە تۇسۋمەن اياقتالدى.
