اقش پرەزيدەنتى دونالد ترامپ حالىقارالىق قاقتىعىستى رەتتەۋگە ۇلەس قوسقانىن تاعى دا مالىمدەدى، دەپ حابارلايدى "ادىرنا" ۇلتتىق پورتالى Report az-عا سىلتەپ.
بۇل تۋرالى ول ۆاشينگتوندا وتكەن بەيبىتشىلىك كەڭەسىنىڭ العاشقى وتىرىسىندا ايتتى.
اق ءۇي باسشىسى ازەربايجان پرەزيدەنتى يلحام اليەۆ پەن ارمەنيا پرەمەر-ءمينيسترى نيكول پاشينيانعا بەيبىتشىلىك ورناتقانى ءۇشىن العىس ءبىلدىردى.
«وتىز جىلعا سوزىلعان كۇرەس – ءبىز ونى تولىق شەشتىك. ۇلكەن راقمەت. بۇل ۇلى ءىس بولدى»، – دەدى ترامپ.
ونىڭ ايتۋىنشا، ەكى ەل اراسىنداعى 32 جىلعا سوزىلعان قاقتىعىس نەبارى 24 ساعات ىشىندە توقتاتىلعان. سونىمەن قاتار، ول ءوزىنىڭ دەلدالدىعىمەن رەتتەلگەن وزگە دە جانجالداردىڭ باسىم بولىگى «شامامەن ەكى كۇن ىشىندە» شەشىمىن تاپقانىن اتاپ ءوتتى.
ترامپ ەكى ەل اراسىنداعى كەلىسسوزدەر بارىسىن دا ەسكە الدى.
«كەزدەسۋ مەنىڭ كەڭسەمدە باستالعاندا، ولار ۇستەلدىڭ قاراما-قارسى بەتىندە وتىردى. مەن جاقىنىراق وتىرۋدى ۇسىندىم. ءبىر ساعاتتان كەيىن ءبىز قاتار وتىردىق، قول الىستىق. ەكى ەل اراسىندا بەيبىتشىلىك ورنادى. بۇل كۇندى ەشقاشان ۇمىتپايمىن. سىزدەر وزدەرىڭىزدى ماقتان تۇتا الاسىزدار. تاماشا ناتيجەگە قول جەتكىزدىڭىزدەر»، – دەدى اقش پرەزيدەنتى.
سونداي-اق ول يلحام اليەۆ پەن نيكول پاشينياندى «جاقسى ادامدار ءارى مىقتى كوشباسشىلار» دەپ اتادى.
