كوكشەتاۋدا جۇرگىزۋشىلەر ساپاسىز جانارمايعا شاعىمداندى. ايتۋلارىنشا، كولىكتەر جانارماي قۇيعاننان كەيىن بىردەن ءوشىپ قالعان، دەپ حابارلايدى «ادىرنا» ءتىلشىسى.
ساپاسىز بەنزينگە قاتىستى جۇرگىزۋشىلەردىڭ شاعىمدارى جەرگىلىكتى پابليكتەردە جاريالاندى.
بەلگىلى بولعانداي، زەرەندى تاسجولىنا شىعاتىن جول بويىنداعى جانارماي قۇيۋ بەكەتتەرىنىڭ بىرىنەن بەنزين قۇيعان بىرنەشە كولىك جول ورتاسىندا توقتاپ قالعان. جۇرگىزۋشىلەر كولىكتەرىن جولدا قالدىرىپ، قالاعا جاياۋ قايتۋعا ءماجبۇر بولعان.
كوكشەتاۋ قالاسىنىڭ كاسىپكەرلىك جانە اۋىل شارۋاشىلىعى ءبولىمىنىڭ مالىمەتىنشە، جانارماي قۇيۋ ستانتسياسى باسشىلىعى ۇسىنعان اقپاراتقا سايكەس، ساپاسىز جانارماي قۇيۋ سالدارىنان زارداپ شەككەن بولۋى مۇمكىن 15 كولىك انىقتالعان.
«اتالعان كولىكتەردىڭ بارلىعى جانارماي جۇيەسىن تازارتۋ بويىنشا قاجەتتى جۇمىستاردى جۇرگىزۋ ءۇشىن تەحنيكالىق قىزمەت كورسەتۋ ستانتسيالارىنا جىبەرىلدى. كولىك يەلەرىنە جانارماي قۇيۋ ستانتسياسى باسشىلىعىنىڭ كەلتىرىلگەن شىعىندى وتەۋ جونىندەگى مىندەتتەمەلەرىن راستايتىن كەپىلدىك حاتتار بەرىلدى»،– دەلىنگەن حابارلامادا.
بۇعان دەيىن قازاقستاندا بەنزينگە قاتىستى شاعىمداردان كەيىن جانارمايدىڭ زاۋىتتان باستاپ جانارماي قۇيۋ ستانتسيالارىنا دەيىنگى جەتكىزىلۋ جولى تەكسەرىلىپ جاتقانى حابارلانعان بولاتىن.
