19 قىركۇيەك مەدەۋ اۋداندىق سوتىندا تولەن توقتاسىنوۆ پەن عالىمجان جاقيانوۆ اراسىنداعى كەزەكتى سوت وتىرىسى ءوتتى، دەپ حابارلايدى “ادىرنا” ءتىلشىسى.
سوت وتىرىسىنا تاعى دا تالاپكەر عالىمجان جاقيانوۆ كەلمەدى.
سوت بارىسىندا جاقيانوۆ تاراپ “ادىرنا” ۇلتتىق پورتالى مەن سوتقا قاتىسقان باق وكىلدەرىنە شاعىم ءتۇسىردى. جاقيانوۆتىڭ وكىلدەرى سۋديا اقپاەۆتان «بۇقارالىق اقپارات قۇرالدارىنا اقپاراتتى بۇرمالاۋدىڭ جانە تاراپتاردىڭ ءبىرىنىڭ مۇددەسىن لوببيلەۋدىڭ الدىن الۋ تۋرالى تۇسىنىك بەرۋدى» سۇرادى. شاعىم “ادىرنا” ۇلتتىق پورتالىنا جانە جاقيانوۆتىڭ كەلمەۋىنە باسا نازار اۋدارعان باسقا دا بۇقارالىق اقپارات قۇرالدارىنا جىبەرىلگەن.
دەگەنمەن، سوت “جاۋاپكەردىڭ رەداكتسيالىق ساياساتىن جۋرناليستەر وزدەرى انىقتايدى” دەگەن ۋاجبەن كەلىسە وتىرىپ، ءوتىنىشتى قاناعاتتاندىرۋدان باس تارتتى. بۇل باسپاسوزگە قىسىم بولۋى مۇمكىن ەكەنىن ايتپاعاندا، تالاپكەردىڭ ءوزى «ادىرناعا» سۇحبات بەرۋدەن باس تارتىپ وتىر.
وسى تۇستا، “ادىرنا” ۇلتتىق پورتالى ەكى تاراپقا دا اشىق ەكەنىن ەسكەرتەدى. عالىمجان جاقيانوۆ مىرزادان سۇحبات الۋعا «ادىرنا» قاشاندا دايار. ءتىپتى، تولەن توقتاسىنوۆپەن بىرگە اشىق اڭگىمەگە شاقىرادى.
ايتا كەتەيىك، قاڭتار ايىندا تولەن توقتاسىنوۆتىڭ «ادىرنانىڭ» يۋتۋب ارناسىنا بەرگەن سۇحباتىنان كەيىن، جاقيانوۆقا “ادىرنا” ۇلتتىق پورتالى الاڭ ۇسىنىپ، سۇحبات بەرۋىن سۇراعان بولاتىن. الايدا ول وعان وڭ جاۋابىن بەرمەي، "ادىرنا" پورتالىنىڭ ۇستىنەن ارىز تاستاپ ۇلگەردى.
ال سوت وتىرىسى تاعى دا كەيىنگە قالدىرىلدى. بۇل سوتتالۋشىنىڭ سوت قۇزىرەتىن الماتى قالاسىنىڭ ەكونوميكالىق سوتىنا بەرۋ تۋرالى وتىنىشىمەن نەگىزدەلگەن. سۋديا "سوت پروتسەسسى الماتى قالاسى بويىنشا ارنايى ەكونوميكالىق سوتىنا جىبەرىلىپ، قارالسىن" دەگەندى قابىلداماي، توقتاسىنوۆتىڭ زاڭگەرلەرىنىڭ وسى شەشىمگە كەلىسپەۋىمشىلىك ارىزىن قاراۋى كەرەك.
وسىلايشا، سوت پروتسەسى ءالى دە جالعاسىن تابادى. كەلەسى سوت وتىرىسى قازان ايىنىڭ ءۇشى كۇنى ءوتۋى مۇمكىن.
«ادىرنا» ۇلتتىق پورتالى
