جيگۋلي دايراباەۆتىڭ مەركىدەگى ءۇيدى زاڭسىز يەمدەنگەنى جايلى دەرەكتىڭ دالەلدەنگەنى حابارلاندى

4238
Adyrna.kz Telegram

7 ماۋسىمدا جامبىل وبلىسى تۇرار رىسقۇلوۆ اۋداندىق سوتى دەپۋتات جيگۋلي دايراباەۆتى «جەرۇيدى تارتىپ الدى» دەپ ايىپتاعان سايت رۋزيەۆتىڭ ارىزىن قاناعاتتاندىردى، دەپ حابارلايدى "ادىرنا" ۇلتتىق پورتالى aikyn.kz-كە سىلتەمە كورسەتە وتىرىپ. 

بۇعان دەيىن الەۋمەتتىك جەلىدە جامبىل وبلىسىنداعى مەركى اۋىلىنىڭ تۇرعىنى ۆيدەو جاريالاپ، 140 ميلليون تەڭگەلىك ءۇيىن «جيگۋلي دايراباەۆ زاڭسىز تارتىپ الدى» دەپ مالىمدەگەن بولاتىن. ونىڭ ايتۋىنشا، دايراباەۆ سوت پروتسەسىنە ارالاسىپ، ءۇيدى ءوز اتىنا راسىمدەگەن. ال باسپانا ۇجىمدىق باسقارۋدا بولعاندىقتان، دايراباەۆقا كەلىسىمسىز بەرىلمەۋى كەرەك ەكەن.

stan.kz-ءتىڭ حابارلاۋىنشا، اۋداندىق سوت وكىلدەرى سايت رۋزيەۆتىڭ شاعىمىن قاناعاتتاندىرعان:

"سايت رۋزيەۆتىڭ بۇرىنعى ايەلى رۋزيەۆا مەن دەپۋتات دايراباەۆ اراسىنداعى ساتۋ-ساتىپ الۋ كەلىسىمشارتىنىڭ كۇشىن جويدى. سونىمەن قاتار ءۇيدى ورتاق مۇلىك دەپ تانىپ، سايت رۋزيەۆتىڭ ۇلەسىن زاڭعا سايكەس بەلگىلەدى، – دەپ جاۋاپ بەرگەن.

اۋعان سوعىسىنىڭ ارداگەرى سايت رۋزيەۆ بۇرىنعى ايەلىمەن بىرنەشە جىل بويى سوتتاسىپ كەلگەن. ايتۋىنشا، ايەل ونىڭ كەلىسىمىن الماي، جالعان قۇجاتتار دايىنداپ، جەرۇيدى جيگۋلي دايراباەۆقا ساتىپ جىبەرگەن.

كوپ ۇزاماي جيگۋلي دايراباەۆ ءوزىن «جەرۇيدى تارتىپ الدى» دەگەن ايىپتاۋدى جوققا شىعارعان ەدى.  دەپۋتات نوتاريۋس ارقىلى جاسالعان كەلىسىمشارتتىڭ زاڭدى ەكەنىن العا تارتىپ، ءۇي يەلەرىنىڭ قۇقىعى ساقتالعانىن مالىمدەگەن.

سونىمەن قاتار باسىلىمنىڭ حابارلاۋىنشا, جامبىل وبلىسىندا تۇرعىندار ماجىلىسمەن جيگۋلي دايراباەۆتىڭ مىڭداعان گەكتار جەردى كەپىلگە قويىپ، بانكتەردەن ميللياردتاعان تەڭگە نەسيە العانىن مالىمدەگەن ەدى. ال دەپۋتاتتىڭ ءوزى نەسيە العان كومپانيادا 5 جىل جۇمىس ىستەگەنىمەن، جەر ماسەلەسىنە دە مۇلدە قاتىسىم بولمادى دەپ وتىر.

"ادىرنا" ۇلتتىق پورتالى

پىكىرلەر