بولات نازارباەۆتىڭ ۇلى، كاسىپكەر نۇربول نازارباەۆ قايتادان ءوزىن بانكروت دەپ تانۋ جونىندە ءوتىنىش بەردى، دەپ حابارلايدى «ادىرنا» ءتىلشىسى tengrinews.kz-كە سىلتەمە جاساپ.
17 اقپاندا سوت ءوتىنىشتى قابىلداپ، "سوت ارقىلى بانكروتتىق ءراسىمىن قولدانۋ تۋرالى" ازاماتتىق ءىس قوزعاعان. قازىرگى تاڭدا ول مەملەكەتكە كەم دەگەندە 63 ملرد تەڭگە قارىز.
ءىستى سوتقا دايىنداۋ اياسىندا نۇربول نازارباەۆ 2026 جىلعى 3 ناۋرىزدا ساعات 15:10-دا «اڭگىمەلەسۋگە» شاقىرىلادى. ىسكە ءۇشىنشى تاراپ رەتىندە الماتى وبلىسىنىڭ مەملەكەتتىك كىرىستەر دەپارتامەنتى تارتىلعان.
نۇربول نازارباەۆتىڭ اتقارۋشىلىق ءوندىرىس بويىنشا كەمىندە ەكى بەرەشەگى بار: 61 854 480 596تەڭگە. ونىڭ ىشىندە 55 ملرد تەڭگەنى مەملەكەت كىرىسىنە - ارنايى قور ەسەبىنە اۋدارىلۋعا ءتيىس.
ناقتىلاپ كەتەيىك، ارنايى مەملەكەتتىك قور زاڭسىز الىنعان دەپ تانىلىپ، مەملەكەتكە قايتارىلعان اكتيۆتەر ەسەبىنەن تولىقتىرىلادى. وعان قاراجاتتى اكتيۆتەردى قايتارۋمەن اينالىساتىن ۋاكىلەتتى ورگاندار، سوتتار، سونداي-اق، سوت شەشىمدەرىن ورىنداعان جەكە جانە زاڭدى تۇلعالار اۋدارادى. ەكىنشى بەرەشەك - 1,6 ملرد تەڭگە كولەمىندەگى مەملەكەتتىك باج (ول دا مەملەكەت كىرىسىنە تولەنۋى كەرەك).
جالپى قارىزى 63,7 ملرد تەڭگەگە جەتەدى. قارىز ەسەپتەن شىعارىلۋى ءۇشىن بەرەشەك 5,5 ملن تەڭگەدەن (1600 اەك) كوپ بولۋى جانە بورىشكەردىڭ بەلگىلى ءبىر مۇلكى بولۋى كەرەك. سوت بانكروتتىعىنىڭ ءمانى مىناداي: بورىشكەردىڭ قولىنداعى مۇلىك (پاتەر، كولىك، بيزنەس، قۇندى زاتتار جانە ت.ب.) ساتىلىپ، تۇسكەن قاراجات كرەديتورلارعا قارىز كولەمىنە قاراي بولىنەدى. ەگەر مۇلىك جەتكىلىكسىز بولسا، قارىز تولىق جابىلماۋى مۇمكىن.
بارلىق ءبولۋ ءراسىمى اياقتالعاننان كەيىن سوت ادامدى بانكروت دەپ تانىپ، قالعان قارىزدىڭ قالدىعىن ەسەپتەن شىعارا الادى. ەگەر نازارباەۆ بانكروت اتانسا، وعان:
- 5 جىل نەسيە الۋعا تىيىم سالىنادى;
- 3 جىل بويى قارجى جاعدايى باقىلاۋدا بولادى;
- قايتا بانكروت بولۋعا تەك 7 جىلدان كەيىن قۇقىلى بولادى.
نازارباەۆتىڭ بانكروتتىققا قاتىستى تالپىنىستارى 2025 جىلدىڭ كۇزىنەن باستالعان. بىلتىر قىركۇيەكتە سوت ۇقساس ءىستى قابىلداعانىمەن، كەيىن قاراۋسىز قالدىرعان.
"2025 جىلعى 19 قاراشاداعى ۇيعارىممەن نازارباەۆ نۇربول بولاتۇلىنىڭ تولەم قابىلەتىن قالپىنا كەلتىرۋ ءراسىمىن قولدانۋ تۋرالى ءوتىنىشى قاراۋسىز قالدىرىلدى", - دەلىنگەن سوتتىڭ رەسمي سۇراۋعا بەرگەن جاۋابىندا.
ول بۇل قاۋلىنى جويۋ ءۇشىن قايتا شاعىمدانعانىمەن، ودان دا باس تارتىلعان. دەمەك، قازىرگى ءوتىنىش - ونىڭ بانكروتتىقتى مويىنداتۋعا ءۇشىنشى ارەكەتى.
