كاسپي جاعالاۋىنان بەكىرە تۇقىمداس 173 بالىقتىڭ ولەكسەسى تابىلدى، دەپ حابارلايدى "ادىرنا" ۇلتتىق پورتالى.
ولاردىڭ جاپپاي قىرىلۋ سەبەبى ازىرگە بەلگىسىز. وقيعانىڭ ءمان-جايىن انىقتاۋ ءۇشىن ارنايى كوميسسيا قۇرىلىپ، تەڭىز سۋىنان زەرتحانالىق تالداۋعا سىناما الىندى.
جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسى مەن ماڭعىستاۋ وبلىسىنىڭ بالىق شارۋاشىلىعى باسقارماسىنىڭ مالىمەتىنشە، بالىق ولەكسەلەرى 2026 جىلعى 20 قازاندا ساعات 11:00 شاماسىندا ماڭعىستاۋ وبلىسى قاراقيا اۋدانىنىڭ اۋماعىندا انىقتالعان. ناقتىراق ايتقاندا، ولار «سارجا» اۋماعى مەن قۇمدى ارالىنىڭ اراسىنداعى جاعالاۋدان تابىلعان. ولەكسەلەر بىرلەسكەن رەيد بارىسىندا انىقتالعان.
مامانداردىڭ مالىمەتىنشە، بالىقتاردىڭ ولەكسەلەرى ابدەن كەۋىپ كەتكەن. وسىعان بايلانىستى زەرتحانالىق تالداۋ جۇرگىزۋ ءۇشىن ولاردىڭ جۇمساق تىندەرىنەن سىناما الۋ مۇمكىن بولماعان. سوندىقتان بالىقتاردىڭ نەدەن قىرىلعانىن ازىرگە انىقتاۋ قيىن بولىپ وتىر.
وقيعانىڭ ءمان-جايىن انىقتاپ، ءتيىستى شارالاردى ۇيىمداستىرۋ ماقساتىندا ارنايى كوميسسيا قۇرىلعان. تابىلعان بالىق ولەكسەلەرى بەلگىلەنگەن تارتىپپەن جينالىپ، تاسىمالدانعان. سونىمەن قاتار ەكولوگيا دەپارتامەنتىنىڭ ماماندارى تەڭىز سۋىنان زەرتحانالىق تالداۋعا سىناما العان.
جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ حابارلاۋىنشا، بۇعان دەيىن دە بەكىرە تۇقىمداس بالىقتاردىڭ ولەكسەلەرىن تەڭىز تولقىنى جاعاعا شىعارعان جاعدايلار تىركەلگەن.
