ماڭعىستاۋ وبلىسىندا مەملەكەت باسشىسىنىڭ باستاماسىمەن جاريالانعان حالىقارالىق ۆولونتەرلەر جىلى اياسىندا «Caspian Sea Action Week – 2026» حالىقارالىق ۆولونتەرلىك اپتالىعىنىڭ سالتاناتتى اشىلۋ ءراسىمى ءوتتى، دەپ حابارلايدى "ادىرنا".
بۇل تۋرالى وبلىس اكىمىنىڭ ورىنباسارى اسحات ورالوۆ جازدى.
ونىڭ ايتۋىنشا، كاسپي تەڭىزىنىڭ ەكوجۇيەسىن ساقتاۋعا باعىتتالعان حالىقارالىق جوبا كاسپي ماڭى ەلدەرىنىڭ كۇش-جىگەرىن بىرىكتىرەتىن ءىرى ەكولوگيالىق باستاما سانالادى.
ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي، حالىقارالىق ۇيىمداردىڭ وكىلدەرى، كاسپي ماڭى مەملەكەتتەرىنىڭ رەسمي دەلەگاتسيالارى، ەكولوگيا سالاسىنىڭ ساراپشىلارى، جاستار ۇيىمدارىنىڭ مۇشەلەرى مەن ۆولونتەرلەر قاتىستى. اپتالىق اياسىنداعى ءىس-شارالارعا قازاقستان، ازەربايجان، رەسەي، تۇرىكمەنستان، يران، وزبەكستان، قىرعىزستان جانە تاجىكستاننان 2 مىڭنان استام ادام قاتىسۋدا.
سالتاناتتى راسىمدە ءسوز سويلەگەن ماڭعىستاۋ وبلىسىنىڭ اكىمى نۇرداۋلەت قيلىباي مۇنداي حالىقارالىق باستامانىڭ وڭىردە ءوتۋى ماڭعىستاۋدىڭ ەكولوگيالىق ىنتىماقتاستىقتى دامىتۋداعى ءرولىن كۇشەيتەتىنىن اتاپ ءوتتى.
سونداي-اق تەگەران كونۆەنتسياسىنىڭ ۋاقىتشا حاتشىلىعىنىڭ ۇيلەستىرۋشىسى م. اليەۆ پەن قازاقستان رەسپۋبليكاسى مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتىنىڭ توراعاسى قايرات قامباروۆ قاتىسۋشىلاردى قۇتتىقتاپ، كاسپي تەڭىزىنىڭ ەكوجۇيەسىن قورعاۋدا مەملەكەتتەردىڭ بىرلەسكەن ءىس-قيمىلىنىڭ ماڭىزىن اتاپ ءوتتى.
ءىس-شارا كونتسەرتتىك باعدارلامامەن جالعاسىپ، العاش رەت «Caspian Sea Action Week – 2026» حالىقارالىق ۆولونتەرلىك اپتالىعىنىڭ رەسمي ءانۇرانى ورىندالدى.
6–12 تامىز ارالىعىندا اپتالىق اياسىندا پانەلدىك پىكىرتالاستار، ەكولوگيالىق اكتسيالار، Clean Caspian Challenge حالىقارالىق جاعالاۋ تازالاۋ ناۋقانى، Caspian Hackathon, TED فورماتىنداعى كەزدەسۋلەر، بوزجىرا شاتقالىنا ەكسپەديتسيا جانە Caspian Sea Talks حالىقارالىق ءسامميتى وتەدى.
جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن ماڭعىستاۋ وبلىسى اكىمدىگى جانە بىرىككەن ۇلتتار ۇيىمىنىڭ ۆولونتەرلەر باعدارلاماسىمەن (UNV) بىرلەسىپ جۇزەگە اسىرىلىپ جاتىر.
