بۇگىن، 19 تامىزدا اقتاۋ قالاسىندا جاڭا كوپفۋنكتسيونالدى ستاديون قۇرىلىسىنىڭ باستالۋىنا ارنالعان ءراسىم ءوتتى. بولاشاق نىساننىڭ ىرگەتاسىنا ۋاقىت كاپسۋلاسى سالىندى. ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي، جەڭىل اتلەتيكادان كسرو چەمپيوناتىنىڭ چەمپيونى ءارى جۇلدەگەرى، كسرو-نىڭ ەڭبەك سىڭىرگەن سپورت شەبەرى امەن تۇياقوۆ، سپورت ارداگەرلەرى، سپورت سالاسىنىڭ جانە قوعام وكىلدەرى، جاتتىقتىرۋشىلار، سپورتشىلار، سپورت ۇيىمدارىنىڭ باسشىلارى مەن قۇرمەتتى قوناقتار قاتىستى.
جاڭا ستاديون ءوڭىردىڭ سپورتتىق ينفراقۇرىلىمىن دامىتۋداعى ماڭىزدى جوبالاردىڭ بىرىنە اينالادى. زاماناۋي ارەنا فۋتبولدى دامىتۋعا، رەسپۋبليكالىق جانە حالىقارالىق دەڭگەيدەگى جارىستاردى وتكىزۋگە، سونداي-اق جاس سپورتشىلاردى دايارلاۋعا مۇمكىندىك بەرەدى.
كەشەننىڭ جالپى اۋماعى 17,29 گەكتاردى قۇرايدى. نەگىزگى ستاديون 10 مىڭ كورەرمەنگە ارنالعان.
ولشەمى 105×68 مەتر بولاتىن فۋتبول الاڭى تابيعي كوگالمەن جابدىقتالىپ، جىلىتۋ جۇيەسىمەن جانە جەراستى درەناجىمەن قامتاماسىز ەتىلەدى. مۇندا ۇلتتىق جانە حالىقارالىق دەڭگەيدەگى فۋتبول ماتچتارىن وتكىزۋ جوسپارلانۋدا.
قازاقستان فۋتبول فەدەراتسياسىنىڭ تالاپتارىنا سايكەس ستاديون 5-ساناتقا، ال UEFA ستاندارتتارى بويىنشا 4-ساناتقا ساي بولادى.
كەشەن قۇرامىندا جاس سپورتشىلاردى جۇيەلى تۇردە دايارلاۋعا ارنالعان فۋتبول اكادەمياسى قاراستىرىلعان. مۇندا جاتتىعۋ، ءبىلىم الۋ، تۇرۋ، مەديتسينالىق سۇيەمەلدەۋ جانە قالپىنا كەلۋ ءۇشىن قاجەتتى جاعدايلار جاسالادى. اكادەميادا 40 ادامعا ارنالعان جاتاقحانا، اسحانا، شاعىن فۋتبول زالى، جاتتىعۋ جانە فۋنكتسيونالدىق زالدار، مەديتسينالىق جانە قالپىنا كەلتىرۋ بلوكتارى، وقۋ كابينەتتەرى مەن كونفەرەنتس-زال بولادى.
سونىمەن قاتار كەشەن اۋماعىندا ەكى جاتتىعۋ الاڭى سالىنادى. كولەمى 60×40 مەتر بولاتىن ءبىرىنشى الاڭ 600 كورەرمەنگە ارنالعان تريبۋنامەن، ال 40×20 مەترلىك ەكىنشى الاڭ 400 كورەرمەنگە ارنالعان تريبۋنامەن جابدىقتالادى.
«بۇگىن ءبىز جاي عانا جاڭا سپورت نىسانىنىڭ ەمەس، ماڭعىستاۋدىڭ بولاشاق جەڭىستەرىنىڭ نەگىزىن قالاپ وتىرمىز. جاڭا ستاديون فۋتبولدى دامىتۋعا، جاس سپورتشىلاردى دايارلاۋعا جانە جوعارى دەڭگەيدەگى جارىستاردى وتكىزۋگە ارنالعان زاماناۋي الاڭعا اينالادى. مەملەكەت باسشىسى قاسىم-جومارت كەمەلۇلى توقاەۆ بۇقارالىق جانە كاسىبي سپورتتى دامىتۋعا، بالالار مەن جاستارعا قاجەتتى جاعداي جاساۋعا ەرەكشە كوڭىل ءبولىپ كەلەدى. وسىنداي جوبالاردى جۇزەگە اسىرۋ — وسى باعىتتاعى ماڭىزدى جۇمىستاردىڭ ءبىرى. ماڭعىستاۋ چەمپيوندار تاربيەلەي الاتىنىن تالاي مارتە دالەلدەدى. جانتىلەك نۇرتىلەپۇلىنىڭ «قازاقستان بارىسى» تۋرنيرىندەگى جەڭىسى ءوڭىرىمىزدىڭ سپورتتىق الەۋەتىنىڭ جارقىن دالەلى بولدى. جاڭا ستاديون مەن فۋتبول اكادەمياسى وسكەلەڭ ۇرپاقتىڭ تالانتىن اشۋعا مۇمكىندىك بەرىپ، ماڭعىستاۋعا ءالى تالاي ۇلكەن جەڭىس اكەلەتىنىنە سەنىمدىمىن. ءبىزدىڭ ماقساتىمىز — وڭىردە بولاشاق چەمپيوندار مەن حالىقارالىق ارەنادا قازاقستاننىڭ نامىسىن ابىرويمەن قورعايتىن سپورتشىلار قالىپتاساتىن مىقتى سپورتتىق ورتا قۇرۋ»، — دەدى ماڭعىستاۋ وبلىسىنىڭ اكىمى نۇرداۋلەت قيلىباي.
جوبا اياسىندا اۆتوتۇراق ايماقتارىن، باقىلاۋ-وتكىزۋ پۋنكتتەرىن، ينجەنەرلىك جانە قوسالقى نىسانداردى سالۋ دا كوزدەلگەن.
ستاديوننىڭ ساۋلەتتىك تۇجىرىمداماسى زاماناۋي ستيلدە ازىرلەنىپ، كاسپي تەڭىزىنىڭ جاعالاۋىنداعى اقتاۋ قالاسىنىڭ وزىندىك ەرەكشەلىگىن ايشىقتايدى. نىساننىڭ ساۋلەتتىك كەلبەتىندە وڭىرگە ءتان بەينەلەر مەن ناقىشتار كورىنىس تاۋىپ، «كاسپي ءىنجۋ-مارجانىنىڭ» زاماناۋي بەينەسى قالىپتاستىرىلادى. كورەرمەندەر تريبۋنالارى جابىق بولادى، ال عيماراتتىڭ قاسبەتى كەشكى ۋاقىتتا ساۋلەتتىك-دەكوراتيۆتىك جارىقتاندىرۋمەن بەزەندىرىلەدى.
جاڭا ستاديون ماڭعىستاۋ وبلىسىنىڭ سپورتتىق ينفراقۇرىلىمىنداعى ماڭىزدى نىسانداردىڭ بىرىنە اينالىپ، ءوڭىر فۋتبولىن جاڭا دەڭگەيگە كوتەرۋگە مۇمكىندىك بەرەدى. زاماناۋي ارەنا، فۋتبول اكادەمياسى مەن جاتتىعۋ بازاسى جاس سپورتشىلاردى دايارلاۋعا، ءىرى جارىستار وتكىزۋگە، سونداي-اق وڭىردەگى بۇقارالىق جانە كاسىبي سپورتتى ودان ءارى دامىتۋعا جاعداي جاسايدى.
