Bügın, 19 tamyzda Aqtau qalasynda jaŋa köpfunksionaldy stadion qūrylysynyŋ bastaluyna arnalǧan räsım öttı. Bolaşaq nysannyŋ ırgetasyna uaqyt kapsulasy salyndy. Is-şaraǧa Maŋǧystau oblysynyŋ äkımı Nūrdäulet Qilybai, jeŋıl atletikadan KSRO chempionatynyŋ chempiony ärı jüldegerı, KSRO-nyŋ eŋbek sıŋırgen sport şeberı Ämen Tūiaqov, sport ardagerlerı, sport salasynyŋ jäne qoǧam ökılderı, jattyqtyruşylar, sportşylar, sport ūiymdarynyŋ basşylary men qūrmettı qonaqtar qatysty.
Jaŋa stadion öŋırdıŋ sporttyq infraqūrylymyn damytudaǧy maŋyzdy jobalardyŋ bırıne ainalady. Zamanaui arena futboldy damytuǧa, respublikalyq jäne halyqaralyq deŋgeidegı jarystardy ötkızuge, sondai-aq jas sportşylardy daiarlauǧa mümkındık beredı.
Keşennıŋ jalpy aumaǧy 17,29 gektardy qūraidy. Negızgı stadion 10 myŋ körermenge arnalǧan.
Ölşemı 105×68 metr bolatyn futbol alaŋy tabiǧi kögalmen jabdyqtalyp, jylytu jüiesımen jäne jerasty drenajymen qamtamasyz etıledı. Mūnda ūlttyq jäne halyqaralyq deŋgeidegı futbol matchtaryn ötkızu josparlanuda.
Qazaqstan futbol federasiiasynyŋ talaptaryna säikes stadion 5-sanatqa, al UEFA standarttary boiynşa 4-sanatqa sai bolady.
Keşen qūramynda jas sportşylardy jüielı türde daiarlauǧa arnalǧan futbol akademiiasy qarastyrylǧan. Mūnda jattyǧu, bılım alu, tūru, medisinalyq süiemeldeu jäne qalpyna kelu üşın qajettı jaǧdailar jasalady. Akademiiada 40 adamǧa arnalǧan jataqhana, ashana, şaǧyn futbol zaly, jattyǧu jäne funksionaldyq zaldar, medisinalyq jäne qalpyna keltıru bloktary, oqu kabinetterı men konferens-zal bolady.
Sonymen qatar keşen aumaǧynda ekı jattyǧu alaŋy salynady. Kölemı 60×40 metr bolatyn bırınşı alaŋ 600 körermenge arnalǧan tribunamen, al 40×20 metrlık ekınşı alaŋ 400 körermenge arnalǧan tribunamen jabdyqtalady.
«Bügın bız jai ǧana jaŋa sport nysanynyŋ emes, Maŋǧystaudyŋ bolaşaq jeŋısterınıŋ negızın qalap otyrmyz. Jaŋa stadion futboldy damytuǧa, jas sportşylardy daiarlauǧa jäne joǧary deŋgeidegı jarystardy ötkızuge arnalǧan zamanaui alaŋǧa ainalady. Memleket basşysy Qasym-Jomart Kemelūly Toqaev būqaralyq jäne käsıbi sportty damytuǧa, balalar men jastarǧa qajettı jaǧdai jasauǧa erekşe köŋıl bölıp keledı. Osyndai jobalardy jüzege asyru — osy baǧyttaǧy maŋyzdy jūmystardyŋ bırı. Maŋǧystau chempiondar tärbielei alatynyn talai märte däleldedı. Jantılek Nūrtılepūlynyŋ «Qazaqstan Barysy» turnirındegı jeŋısı öŋırımızdıŋ sporttyq äleuetınıŋ jarqyn dälelı boldy. Jaŋa stadion men futbol akademiiasy öskeleŋ ūrpaqtyŋ talantyn aşuǧa mümkındık berıp, Maŋǧystauǧa älı talai ülken jeŋıs äkeletınıne senımdımın. Bızdıŋ maqsatymyz — öŋırde bolaşaq chempiondar men halyqaralyq arenada Qazaqstannyŋ namysyn abyroimen qorǧaityn sportşylar qalyptasatyn myqty sporttyq orta qūru», — dedı Maŋǧystau oblysynyŋ äkımı Nūrdäulet Qilybai.
Joba aiasynda avtotūraq aimaqtaryn, baqylau-ötkızu punktterın, injenerlık jäne qosalqy nysandardy salu da közdelgen.
Stadionnyŋ säulettık tūjyrymdamasy zamanaui stilde äzırlenıp, Kaspii teŋızınıŋ jaǧalauyndaǧy Aqtau qalasynyŋ özındık erekşelıgın aişyqtaidy. Nysannyŋ säulettık kelbetınde öŋırge tän beineler men naqyştar körınıs tauyp, «Kaspii ınju-marjanynyŋ» zamanaui beinesı qalyptastyrylady. Körermender tribunalary jabyq bolady, al ǧimarattyŋ qasbetı keşkı uaqytta säulettık-dekorativtık jaryqtandyrumen bezendırıledı.
Jaŋa stadion Maŋǧystau oblysynyŋ sporttyq infraqūrylymyndaǧy maŋyzdy nysandardyŋ bırıne ainalyp, öŋır futbolyn jaŋa deŋgeige köteruge mümkındık beredı. Zamanaui arena, futbol akademiiasy men jattyǧu bazasy jas sportşylardy daiarlauǧa, ırı jarystar ötkızuge, sondai-aq öŋırdegı būqaralyq jäne käsıbi sportty odan ärı damytuǧa jaǧdai jasaidy.
