الماتىدا ميتينگ وتكىزىپ، ايىپپۇل ارقالاعان ءبىر توپ ازامات استاناعا كەلىپ، مادەنيەت جانە سپورت ءمينيسترى اسحات ورالوۆپەن كەزدەسكىسى كەلگەن. ايتسە دە مينيستر ءمۇيىزى قاراعايداي ازاماتتاردىڭ الدىنا شىعىپ، ءمان-جايدى ءتۇسىندىرۋدى بويىنا شاق كورمەدى. مەملەكەت باسشىسى قاسىم-جومارت توقاەۆتىڭ «ەستيتىن ۇكىمەت» دەگەن ساياساتىنا اسحات رىزدىقۇلى نەگە نەمقۇرايلى قارادى؟
بەلگىلى اكتەر ازامات شارعىن باستاعان ءبىر توپ ازامات مينيسترلىك عيماراتىنىڭ الدىندا اسحات ورالوۆتى كۇتتى. الايدا
«وسى جىلدىڭ 1 جانە 30 ناۋرىز ارالىعىندا وتكەن ۇلتتىق كينونى قولداۋ مەملەكەتتىك ورتالىعى وتكىزگەن ىرىكتەۋ كونكۋرسىنىڭ ادىلەتسىز، ورەسكەل زاڭ بۇزۋشىلىقپەن وتكەن بولاتىن. ءبىز سوعان نارازى بولىپ، ءبىر توپ كينوگەرلەر پرەزيدەنت پەن پرەزيدەنت اكىمشىلىگىنە، مەملەكەتتىك كەڭەسشى، مادەنيەت مينيسترىنە حات جولداعان بولاتىنبىز. بىراق ەشقانداي رەاكتسيا بولماعاننان كەيىن الماتىدا ميتينگكە شىقتىق. ميتينگتەن كەيىن نارازىلىققا شىققان ادامداردىڭ بارلىعىن پوليتسيا ءبولىمى شاقىرىپ، 70 مىڭ مەن 170 مىڭ تەڭگەنىڭ ارالىعىندا ايىپپۇل سالىپ تاستادى. ال ءبىز ايىپپۇل تولەمەيتىنىمىزدى ايتىپ، 15 تاۋلىككە قامۋدى سۇرادىق. بىراق ولار بىرجاقتى شەشىم شىعارىپ بارلىعىمىزعا ايىپپۇل سالىپ تاستادى.
«ەستيتىن ۇكىمەتكە» ءبىزدىڭ ميتينگكە شىققاننان كەيىنگى شۋىمىز، نارازىلىعىمىز جەتكەن بولۋى كەرەك، مادەنيەت ءمينيسترىنىڭ ورىنباسارى نۇرعيسا داۋەشوۆ الەۋمەتتىك جەلىدە ءبىزدىڭ تالابىمىز بويىنشا بەلگىسىز ءبىر ۋاقىتقا دەيىن پيتچينگ توقتاتىلاتىنىن مالىمدەدى. سونداي-اق ول تەكسەرىس جۇرگىزۋ ءۇشىن تاۋەلسىز كوميسسيا قۇرىلاتىنىن ايتتى. ءبىز ميتينگكە شىققان كەزدە تاۋەلسىز كوميسسيانىڭ قۇرامىندا كىمدەر بولۋى كەرەك جانە نە نارسە تەكسەرىلۋى كەرەك دەگەندى جازعان بولاتىنبىز. مىسالى وتكەن 130 جوبا مەن وتپەي قالعان 153 جوبا سالىستىرىلىپ، تەكسەرىلۋى كەرەك. ويتكەنى وتكەن 130 جوبانىڭ ىشىندە زاڭسىز وتكەن 4 جوبا ناقتى بار ەكەنىن دالەدەيتىن قۇجاتتاي دالەلىمىز بار. ءبىز مۇنى الماتىدا وتكەن ءباسپاسوز ءماسليحاتىندا اشىق ايتقان بولاتىنبىز. مىنە سونى تالقىلاۋعا مينيسترلىككە كەلىپ، مينيسترمەن كەزدەسەمىز دەپ ويلادىق. الماتىدان 19 كۇنى شىعىپ 20 كۇنى استاناعا كەلدىك. استاناعا كەلگەندەگى ماقساتىمىز مينيسترمەن كەزدەسىپ، سويلەسۋ بولاتىن، الايدا مينيتسر قابىلدامادى.
مينيسترلىككە قاراستى مادجەنيەت كوميتەتىنىڭ باسشىسىمەن كەزدەسىپ، بارلىق جاعدايدى باياندادىق. ول «تاۋەلسىز كوميسسيادان كەيىنگى سەندەردىڭ تالاپتارىڭدى بىزدەر شەشە المايمىز. بىراق مينيسترگە جەتكىزەمىز» دەپ ايتتى. بۇگىن سەنبى بولسا دا مينيسترلىكتىڭ الدىنا كەلىپ، ءمينيستردى كۇتىپ تۇرمىز، بىراق ول كەلمەدى»، – دەدى ازامات شارعىن.
كينوگەرلەر جۋرناليستەرگە ءمان-جايدى ءتۇسىندىرىپ تۇرعاندا ءماجىلىس دەپۋتاتى ەرلان سايىروۆ كەزدەسىپ قالدى. ازامات شارعىن وزدەرىنىڭ قانداي تالاپپەن مينيسترلىككە كەلگەنىن دەپۋتاتقا ءتۇسىندىرىپ بەردى.
«كەلەسى اپتادا مينيسترلىككە ءماجىلىس دەپۋتاتتارى اتىنان حات جىبەرەمىز. بىرىنشىدەن مۇنداي ماسەلەدە ادىلەتتىلىك بولۋى كەرەك. ەكىنشىدەن، ءبىز قۇقىقتىق مەملەكەتتە ءومىر سۇرگەننەن كەيىن زاڭ تالاپتارى مۇلتىكسىز ورىندالۋى كەرەك. بۇل ءبىزدىڭ پريتسپتىك پوزيتسيا. ەگەر سىزدەر زاڭسىزدىق بار دەپ ەسەپتەسەڭىزدەر باس پروكۋراتۋرا مەن انيكورعا جۇگىنىڭىزدەر»، – دەپ اقىل كەڭەسىن ايتتى.
«بالۋان شولاق» ءفيلمىنىڭ رەجيسسەرى نۇرگەلدى سادىعۇلوۆ وزدەرىنىڭ ورتاق ادىلەتتىلىك ءۇشىن كۇرەسىپ جۇرگەنىن ايتادى. سوندىقتان دا ول بارلىق كينوگەرلەردىڭ ورتاق پوزيتسيادا جۇمىس ىستەۋگە شاقىردى.
«نۇرعيسا داۋەشوۆ «قۇجاتتاردى تەكسەرتەمىز» دەپ جاتىر عوي. ءبىزدىڭ ءاۋ باستاعى ۇستانىمىمىز وسىنداعى 5-6 جىگىتتىڭ جوباسىن وتكىزىپ بەرسىن دەگەن تالاپ ەمەس. بۇل جەردە ورتاق ادىلەتتىلىك بولۋى كەرەك. ولار وسى 5-6 جىگىتتىڭ جوباسىن وتكىزىپ جىبەرەيىك دەپ ويلاۋى مۇمكىن. ول جوبا ودان ارى وتە مە، وتپەي مە، ول جاعى تاعى بەلگىسىز. وكىنىشكە قاراي كينوگەرلەردىڭ اراسىندا «ولار ءوز جوبالارى ءۇشىن جۇگىرىپ ءجۇر» دەگەن تۇسىنبەۋشىلىك بولىپ جاتىر. جوق، ءبىز بۇل جەردە ادىلەتتىلىك ءۇشىن جۇگىرىپ ءجۇرمىز. ەگەر وسى 5-6 كينوگەرلەردىڭ جوباسىن وتكىزىپ جىبەرەيىك دەگەن اڭگىمە بولسا، ول دۇرىس نارسە ەمەس. بۇل جەردە مەن ءوز ارىپتەستەرىمە ءبىز ورتاق ادىلەتتىلىك ءۇشىن كۇرەسىپ جاتقانىمىزدى باسا ايتقىم كەلەدى. ءبىزدىڭ ءاۋ باستاعى تالابىمىز ەش وزگەرگەن جوق. ماسەلەمىز جارتىلاي شەشىلىپ جاتىر، بىراق تا تالاپتارىمىز تۇبەگەيلى شەشىلىپ جاتقان جوق. مينيسترمەن كەزدەسۋدەگى ماقساتىمىز قازىر بولىپ جاتقان جاعدايدى دۇرىس شەشۋ ءۇشىن مينيسترلىككە كومەكتەسكىمىز كەلەدى»، – دەدى ول.
مينيسترلىكتىڭ الدىنا جينالعان ازاماتتاردىڭ ىشىندە ەلگە ەتەنە تانىس ازاماتتار. مىسالى ازامات شارعىن ءار ءتۇرلى سەريالدارعا ءتۇسىپ جۇرگەن ازامات. سونداي-اق كينوگەرلەردىڭ اراسىندا شونا سماحانۇلى سەكىلدى ەلگە بەلگىلى اقىننىڭ ۇلى جانسەرىك شوناۇلى بار. اسحات ورالوۆ وسىنداي ەلگە بەلگىلى ازاماتتاردىڭ الدىنا شىقپاسا، قاراپايىم حالىقتى مۇلدە كوزگە ىلمەيدى عوي. مۇنداي شەنەۋنىكتەرگە پرەزيدەنت «جەرگە تۇسىڭدەر» دەپ ايتتى ەمەس پە؟
سەرىك جولداسباي
