ەلورداداعى Qazaq Creative Hub الاڭىندا «زەردەلى ۇلت: وقۋ مادەنيەتى جانە ۇلت بولاشاعى» تاقىرىبىندا Aqsham Talks زياتكەرلىك الاڭى ءوتتى. جوبانى «Elorda Aqparat» مەدياسەرىكتەستىگى مەملەكەت باسشىسى قاسىم-جومارت توقاەۆتىڭ كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى باستاماسىن قولداۋ ماقساتىندا ۇيىمداستىردى.
ءىس-شارا بارىسىندا «Elorda Aqparat» جشس ديرەكتورى ولجاس سىدىقبەك Aqsham Talks-تىڭ قوعامداعى ءبىلىم، تەحنولوگيا، ساياسات، كاسىپ جانە تۇلعالىق دامۋ سەكىلدى وزەكتى ماسەلەلەردى تالقىلايتىن اشىق پىكىرتالاس الاڭى ەكەنىن اتاپ ءوتتى. سونداي-اق، بۇگىننەن باستاپ «استانا اقشامى» گازەتىندە وقۋ مادەنيەتى مەن ۇلتتىق قۇندىلىقتاردى ناسيحاتتايتىن ارنايى Aqsham Talks ايدارى تۇراقتى تۇردە جاريالاناتىنىن جەتكىزدى.
جيىندا ءسوز سويلەگەن سەنات دەپۋتاتى نۇرتورە ءجۇسىپ مۇنداي جوبالاردىڭ قوعامنىڭ رۋحاني دامۋىنا سەرپىن بەرەتىنىن ايتىپ، مازمۇندى كەزدەسۋلەردىڭ كوبەيە تۇسۋىنە تىلەكتەستىك ءبىلدىردى.
كەزدەسۋگە حالىقارالىق قۇقىق مامانى المات يگەنباەۆ، جاساندى ينتەللەكت زەرتتەۋشىسى تيمۋر بەكتۇر، فيلولوگ-زەرتتەۋشى ارىن قۇنانبايۇلى، پەداگوگ ەسكەندىر بەستاي جانە ستسەناريست، كرەاتيۆتى پروديۋسەر رامازان فايلوۆ قاتىسىپ، كىتاپ وقۋ مادەنيەتى مەن ءبىلىمنىڭ ماڭىزى تۋرالى ويلارىن ورتاعا سالدى.
فيلولوگ-زەرتتەۋشى ارىن قۇنانبايۇلى وقۋ داعدىسىن قالىپتاستىرۋدىڭ عىلىمي نەگىزىنە توقتالىپ، بالانى كىتاپقا باۋلۋدىڭ ەڭ ءتيىمدى جولى – وعان كىتاپتى داۋىستاپ وقىپ بەرۋ ەكەنىن ايتتى.
«بالا وقىپ تۋمايدى، سويلەپ تۋادى. سوندىقتان “كىتاپ وقى” دەگەننەن گورى، “كەل، كىتاپ وقىپ بەرەيىن” دەگەن ۇستانىم ماڭىزدى. كىتاپ وقىپ بەرەتىن ۇلت قانا كىتاپ وقيتىن ۇلتقا اينالادى»، – دەدى سپيكەر.
جيىن سوڭىندا قاتىسۋشىلار وقۋ مادەنيەتىن قالىپتاستىرۋ – تەك ءبىلىم بەرۋ جۇيەسىنىڭ ەمەس، بۇكىل قوعامنىڭ ورتاق مىندەتى ەكەنىنە توقتالىپ، مۇنداي باستامالاردىڭ زەردەلى ۇلت تاربيەلەۋگە ىقپال ەتەتىنىن اتاپ ءوتتى.
