فوتو: FlyArystan
الماتى قالاسىنىڭ سوتى FlyArystan اۋەكومپانياسىنا ساۋدا جانە ينتەگراتسيا مينيسترلىگى تاراپىنان بەرىلگەن نۇسقامانى زاڭدى دەپ تانىدى. بۇعان كومپانيانىڭ ىشكى ەرەجەلەرىنەن جولاۋشىلاردىڭ زاڭدى قۇقىقتارىن شەكتەيتىن بىرقاتار تالاپتاردىڭ انىقتالۋى سەبەپ بولعان. بۇل تۋرالى ۆەدومستۆونىڭ رەسمي سايتى جاريالادى، دەپ حابارلايدى “ادىرنا”.
وقيعا جولاۋشىلاردىڭ بىرىنەن تۇسكەن شاعىمنان كەيىن باستالعان. وسىعان بايلانىستى الماتى قالاسىنىڭ ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى تۇتىنۋشىلاردىڭ قۇقىقتارىن قورعاۋ كوميتەتىمەن جانە ونىڭ استاناداعى اۋماقتىق دەپارتامەنتىمەن بىرلەسىپ، اۋەكومپانياعا جوسپاردان تىس تەكسەرۋ جۇرگىزدى.
تەكسەرۋ ناتيجەسىندە FlyArystan كومپانياسىنىڭ ىشكى قۇجاتتارىندا قازاقستان زاڭناماسىندا كوزدەلگەن جولاۋشىلار قۇقىقتارىن شەكتەيتىن بىرنەشە ەرەجە بارى بەلگىلى بولدى.
اتاپ ايتقاندا، زاڭبۇزۋشىلىقتار مىناداي ماسەلەلەردى قامتىعان:
- تاسىمالداۋ شارتتارىن اۋەكومپانيانىڭ بىرجاقتى تارتىپپەن وزگەرتۋى;
- كومپانيانىڭ جولاۋشىلار الدىنداعى جاۋاپكەرشىلىگىن شەكتەۋى;
- زاڭناما تالاپتارىنا سايكەس كەلمەيتىن قوسىمشا تولەمدەردى الۋ;
- بيلەتتىڭ اقشاسىن قايتارۋ قۇقىعىنا شەكتەۋ قويۋ;
- جولاۋشىلارعا قاجەتتى اقپاراتتى تولىق ۇسىنباۋ جانە جازباشا شاعىم بەرۋ مۇمكىندىگىن شەكتەۋ.
تەكسەرۋ قورىتىندىسى بويىنشا ۋاكىلەتتى ورگان اۋەكومپانياعا انىقتالعان كەمشىلىكتەردى جويۋدى جانە جولاۋشىلاردى تاسىمالداۋ ەرەجەلەرىن قولدانىستاعى زاڭناماعا سايكەستەندىرۋدى مىندەتتەدى.
الايدا FlyArystan تەكسەرۋ ناتيجەلەرىمەن كەلىسپەي، مينيسترلىك بەرگەن نۇسقامانىڭ كۇشىن جويۋدى تالاپ ەتىپ، سوتقا شاعىمدانعان.
2026 جىلعى 21 شىلدەدە الماتى قالاسىنىڭ مامانداندىرىلعان اۋدانارالىق اكىمشىلىك سوتى اۋەكومپانيانىڭ تالابىن قاناعاتتاندىرۋدان باس تارتتى. كومپانيا بۇل شەشىمگە اپەللياتسيالىق شاعىم تۇسىرگەنىمەن، جوعارى ساتىداعى سوت العاشقى ۇكىمدى وزگەرىسسىز قالدىردى.
وسىلايشا سوت تۇتىنۋشىلاردىڭ قۇقىقتارىن قورعاۋ ورگاندارىنىڭ تەكسەرۋ جۇرگىزۋى مەن انىقتالعان زاڭبۇزۋشىلىقتاردى جويۋ جونىندەگى تالاپتارىنىڭ زاڭدىلىعىن راستادى.
ساۋدا جانە ينتەگراتسيا مينيسترلىگى اۋەكومپانيالاردىڭ ىشكى ەرەجەلەرى زاڭ تالاپتارىنا قايشى كەلمەۋى كەرەكتىگىن ەسكە سالدى. اتاپ ايتقاندا، تاسىمالداۋ شارتتارى، بيلەت قۇنىن قايتارۋ، قوسىمشا تولەمدەر جانە تۇتىنۋشىلاردىڭ شاعىمدارىن قاراۋ ءتارتىبى جولاۋشىلاردىڭ زاڭمەن بەكىتىلگەن قۇقىقتارىن شەكتەمەۋى ءتيىس.
ايتا كەتەيىك، بۇعان دەيىن، 2025 جىلى ازاماتتىق اۆياتسيا كوميتەتى جولاۋشىلاردى، باگاج بەن جۇكتەردى تاسىمالداۋ تالاپتارىن بۇزعانى ءۇشىن قازاقستاننىڭ ءتورت اۋەكومپانياسىن اكىمشىلىك جاۋاپكەرشىلىككە تارتقان بولاتىن.
