رەسەيدىڭ سانكت-پەتەربۋرگ قالاسىنداعى لەنين اۋداندىق سوتى بلوگەر ەكاتەرينا بيۆولدى قازاقتار مەن قىرعىزداردىڭ ار-نامىسىنا تيەتىن سوزدەر ايتقانى ءۇشىن كىنالى دەپ تانىدى، دەپ حابارلايدى "ادىرنا".
ءىس ماتەريالدارىنا سايكەس، سوت ەكاتەرينا بيۆولدى رەسەي فەدەراتسياسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 20.3.1-بابى بويىنشا اكىمشىلىك جاۋاپكەرشىلىككە تارتقان. ناتيجەسىندە ول 60 ساعات قوعامدىق جۇمىسقا تارتۋ جازاسىنا كەسىلدى.
ايتا كەتەيىك، اتالعان ءىس 2025 جىلدىڭ قازان ايىندا Telegram جەلىسىندە جاريالانعان بەينەجازباعا بايلانىستى قوزعالعان. بۇل ماتەريالدى رەسەي ىشكى ىستەر مينيسترلىگىنىڭ ەكسترەميزمگە قارسى ءىس-قيمىل ورتالىعىنىڭ قىزمەتكەرلەرى تەكسەرگەن.
ساراپتامالىق قورىتىندىعا سايكەس، بەينەجازبادا قازاق جانە قىرعىز ۇلتتارىنىڭ ار-نامىسىنا تيەتىن، قادىر-قاسيەتىن كەمسىتەتىن سوزدەر ايتىلعان. وسىعان بايلانىستى ەكاتەرينا بيۆولعا قاتىستى "ۇلتارالىق ارازدىقتى جاريا تۇردە قوزدىرۋ" دەرەگى بويىنشا اكىمشىلىك ءىس قوزعالعان.
سونداي-اق 2025 جىلى كاسىپقوي بوكستان الەم چەمپيونى دميتري بيۆول ءوزى دە بۇرىنعى ايەلى ەكاتەرينا بيۆولعا قارسى جالا جابۋ دەرەگى بويىنشا سوتتا جەڭىسكە جەتكەن ەدى.
سانكت-پەتەربۋرگ قالاسىنداعى سمولنين اۋداندىق سوتى دميتري بيۆولدىڭ بۇرىنعى ايەلىنە قارسى بەرگەن ازاماتتىق تالابىن قارادى.
وندا شىندىققا سايكەس كەلمەيتىن، ار-نامىسى مەن قادىر-قاسيەتىنە، سونداي-اق ىسكەرلىك بەدەلىنە نۇقسان كەلتىرەتىن مالىمەتتەردى جالعان دەپ تانۋ جانە ولاردى تەرىسكە شىعارۋ تۋرالى مىندەتتەۋ ماسەلەسى كوتەرىلگەن.
سوت سپورتشىنىڭ جاعىنا شىعىپ، جاۋاپكەر تاراتقان مالىمەتتەردى شىندىققا جاناسپايتىن، تالاپكەردىڭ ار-نامىسى مەن قادىر-قاسيەتىنە، ىسكەرلىك بەدەلىنە نۇقسان كەلتىرەتىن اقپارات دەپ تانىدى.
وسىعان بايلانىستى ەكاتەرينا بيۆولعا وزىنە تيەسىلى بارلىق سايتتاردا، الەۋمەتتىك جەلىدەگى پاراقشالارىندا جانە مەسسەندجەرلەردەگى ارنالارىندا بۇرىن جاريالانعان اقپاراتتى تەرىسكە شىعارۋ مىندەتتەلگەن.
