استانا قالاسىنىڭ ازاماتتىق ىستەر جونىندەگى اۋدانارالىق سوتىندا بۇگىن نازارباەۆتار اۋلەتىنىڭ ەسىمى اتالعان ءىس قارالا باستادى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
ىستە تالاپكەر رەتىندە باس پروكۋراتۋرا جانىنداعى اكتيۆتەردى قايتارۋ كوميتەتى كورسەتىلگەن، ال جاۋاپكەر – نازارباەۆ ن. ب. بۇل مارقۇم بولات نازارباەۆتىڭ 41 جاستاعى ۇلى نۇربول نازارباەۆ بولۋى مۇمكىن دەگەن بولجام بار. دەگەنمەن ءىستىڭ ناقتى ءمان-جايى جاريا ەتىلمەي، سوت تا، كوميتەت تە قۇپيالىلىققا سىلتەمە جاساعان.
Telegram-ارنالاردىڭ مالىمەتىنشە، بيىلعى 8 قىركۇيەكتە پرەزيدەنت قاسىم-جومارت توقاەۆ حالىققا جولداۋىندا اتالعان كوميتەتتى «ينۆەستورلاردىڭ قۇقىقتارىن قورعاۋ كوميتەتى» دەپ قايتا اتاۋدى ۇسىنعان. ول باس پروكۋراتۋرانىڭ زاڭسىز اكتيۆتەردى يەلەرىنەن قايتارۋدا اتقارعان جۇمىسىنا وڭ باعاسىن بەرىپ، بۇل باستامانى «ەسكى» جانە «جاڭا» قازاقستان اراسىنداعى تەكەتىرەستىڭ اياقتالعانىنىڭ بەلگىسى دەپ تۇسىنگەن ساراپشىلار دا بولدى.
اشىق دەرەككوزدەرگە سۇيەنسەك، نۇربول نازارباەۆ 2011-2017 جىلدارى الماتى وبلىستىق ءىىد-دە قىزمەت اتقارعان، باسشىنىڭ ورىنباسارى قىزمەتىنە دەيىن كوتەرىلگەن. ال 2017 جىلى ول Prime Capital Holding ينۆەستيتسيالىق قورىن قۇرىپ، باقىلاۋ كەڭەسىن باسقارعان.
