ارمەنيانىڭ بۇرىنعى پرەزيدەنتى سەرج سارگسياننىڭ سوتى باستالدى

3807
Adyrna.kz Telegram

ارمەنيادا بۇرىنعى پرەزيدەنت سەرج سارگسياننىڭ سوتى باستالدى. بۇل تۋرالى "ارمەنيا جاڭالىقتارى" باسىلىمى حابارلادى دەپ جازادى centralasian.org.

بۇرىنعى پرەزيدەنتكە قارسى قىلمىستىق ءىس اۋىل شارۋاشىلىعى باعدارلاماسىنا سايكەس بولىنگەن قارجىنى ۇرلاۋعا بايلانىستى قوزعالعان. سارگسياننان باسقا بۇل ءىس بويىنشا ءتورت ادام جاۋاپقا تارتىلىپ جاتىر. ولاردىڭ اراسىندا اۋىل شارۋاشىلىعى ءمينيسترى سەرگو كاراپەتيان دا بار.

سەيسەنبى كۇنى ەرەۆانداعى اۆان جانە نور نورك اۋداندىق سوتتارىندا پروتسەدۋرالىق ماسەلەلەر تالقىلاندى.

سەرج سارگسيان وزىنە تاعىلعان ايىپتاردى مويىندامايدى. ول بۇل ءىستىڭ ساياسي استارى بار دەپ بىلەدى.

ارمەنيادا ەكى مەرزىم قاتارىنان پرەزيدەنت بولعان سارگسيان 2018 جىلى وتستاۆكاعا كەتتى. ونىڭ پرەمەر-مينيستر قىزمەتىندە قالۋ ارەكەتى حالىق نارازىلىعىن تۋعىزىپ، سوڭىندا ۇكىمەت باسىنا بۇرىنعى جۋرناليست نيكول پاشينيان سايلانعان.

2019 جىلى جەلتوقساندا سارگسيان كوررۋپتسيالىق سحەما قۇردى دەپ ايىپتالىپ، ارمەنيادان شىعۋىنا تىيىم سالىنعان. 65 جاستاعى ەكس-پرەزيدەنت كىنالى دەپ تانىلسا، سەگىز جىلعا دەيىن باس بوستاندىعىنان ايىرىلۋى مۇمكىن.

پىكىرلەر