وڭتۇستىك كورەيانىڭ بۇرىنعى پرەزيدەنتى يۋن سوك يول 2022 جىلعى پرەزيدەنتتىك سايلاۋ ناۋقانى كەزىندە جالعان مالىمدەمە جاساپ، سايلاۋ زاڭناماسىن بۇزعانى ءۇشىن كىنالى دەپ تانىلدى. بۇل تۋرالى Yonhap اگەنتتىگى جازدى، دەپ حابارلايدى "ادىرنا".
سەۋل سوتىنىڭ شەشىمىمەن ەكس-پرەزيدەنت 18 ايعا باس بوستاندىعىنان ايىرىلدى. الايدا سوت ۇكىمنىڭ ورىندالۋىن ءۇش جىلعا كەيىنگە شەگەردى.
تەرگەۋ مالىمەتىنشە، يۋن سوك يول 2022 جىلعى ناۋرىزداعى پرەزيدەنت سايلاۋى قارساڭىندا حالىق بيلىگى پارتياسىنان كانديدات رەتىندە تىركەلۋ كەزىندە جالعان اقپارات بەرگەن.
ەگەر بۇل ۇكىم اپەللياتسيالىق ساتىدا وزگەرىسسىز قالسا، حالىق بيلىگى پارتياسى يۋن سوك ءيولدىڭ سايلاۋداعى جەڭىسىنەن كەيىن سايلاۋ كوميسسياسىنان ناۋقان شىعىندارىن وتەۋ ءۇشىن العان شامامەن 40 ميلليارد ۆوندى مەملەكەتكە قايتارۋعا مىندەتتەلەدى.
ەكس-پرەزيدەنتتىڭ قورعاۋشىلارى سوت شەشىمىمەن كەلىسپەيتىندەرىن ايتىپ، وندا كوپتەگەن قۇقىقتىق قاتەلىكتەر بار ەكەنىن العا تارتتى. ولار ۇكىمگە اپەللياتسيالىق شاعىم تۇسىرەتىنىن مالىمدەدى.
ايتا كەتەيىك، بۇل – يۋن سوك يولگە قاتىستى شىعارىلعان العاشقى ۇكىم ەمەس. بۇعان دەيىن ول «ساياسي قورلار تۋرالى» زاڭدى بۇزعانى ءۇشىن تاعى ەكى جىلعا سوتتالعان بولاتىن.
سونداي-اق 2026 جىلدىڭ اقپانىندا بۇرىنعى پرەزيدەنت اسكەري جاعداي جاريالاۋ ارقىلى بۇلىك ۇيىمداستىردى دەگەن ايىپپەن ءومىر بويىنا باس بوستاندىعىنان ايىرىلعان ەدى. كەيىن ول بۇل شەشىمگە شاعىم ءتۇسىردى.
ماۋسىم ايىندا سوت يۋن سوك ءيولدى جاۋعا جاردەمدەستى جانە قىزمەتتىك وكىلەتتىگىن اسىرا پايدالاندى دەپ تانىپ، 30 جىلعا باس بوستاندىعىنان ايىرعان.
بۇدان بولەك، وڭتۇستىك كورەيانىڭ جوعارعى سوتى سوت تورەلىگىنە كەدەرگى كەلتىردى دەگەن ءىس بويىنشا وعان شىعارىلعان جەتى جىلدىق تۇرمە جازاسىن دا كۇشىندە قالدىرعان بولاتىن.
