ەلدە جەمقورلىققا قاتىسى بار تۇلعالاردان تاركىلەنگەن قارجىدان 90 مەكتەپ قارجىلاندىرىلعان، دەپ حابارلايدى “ادىرنا”.
ونىڭ 83-ءى پايدالانۋعا بەرىلدى.
وقۋ-اعارتۋ ۆيتسە-ءمينيسترى جايىق شاراباسوۆتىڭ مالىمەتىنشە، مەملەكەت باسشىسىنىڭ تاپسىرماسىمەن 2023 جىلى ارنايى قور قۇرىلعان. تاركىلەنگەن قاراجات وسى قورعا اۋدارىلىپ، ءبىلىم بەرۋ نىساندارىن سالۋعا جانە جوندەۋگە باعىتتالادى.
«قورعا وسى ۋاقىتقا دەيىن شامامەن 159 ميلليارد تەڭگە جينالدى. بۇل قاراجات ەسەبىنەن 100 مىڭعا جۋىق وقۋشىعا ارنالعان 90 ءبىلىم بەرۋ نىسانىنىڭ قۇرىلىسى قارجىلاندىرىلدى. ونىڭ 83-ءى پايدالانۋعا بەرىلدى. قالعان جەتى نىساننىڭ قۇرىلىسىن جىل سوڭىنا دەيىن اياقتاۋ جوسپارلانىپ وتىر. جالپى، سوڭعى جەتى جىلدا قازاقستاندا 1 ميلليون وقۋشىعا ارنالعان 1300-دەن استام ورتا ءبىلىم بەرۋ ۇيىمى سالىندى»، – دەدى ۆيتسە-مينيستر.
ونىڭ ايتۋىنشا، قابىلدانعان شارالاردىڭ ناتيجەسىندە ءۇش اۋىسىمدا ءبىلىم بەرەتىن مەكتەپتەردىڭ سانى بەس ەسە ازايعان.
سوعان قاراماستان، ەلىمىزدە جاڭا مەكتەپتەر سالۋ جۇمىستارى جالعاسادى. وقۋ-اعارتۋ مينيسترلىگىنىڭ بولجامىنشا، الداعى ۋاقىتتا تۋ كورسەتكىشىنىڭ وسۋىنە بايلانىستى وقۋشى ورىندارىنا دەگەن قاجەتتىلىك ارتادى. سوندىقتان مينيسترلىك بوس ورىنداردىڭ ارتىق بولۋىنان گورى، قازىرگى تاپشىلىقتى ازايتۋعا باسىمدىق بەرىپ وتىر.
سونىمەن قاتار اپاتتى جاعدايداعى مەكتەپتەردىڭ سانى ەكى ەسە قىسقارعانىمەن، ەلىمىزدە ءالى دە 27 وسىنداي ءبىلىم بەرۋ مەكەمەسى بار.
وقۋ-اعارتۋ مينيسترلىگى ينۆەستيتسيالىق ساياسات جانە ينفراقۇرىلىمدى دامىتۋ دەپارتامەنتىنىڭ ديرەكتورى ايقوجا ابسادىقوۆتىڭ ايتۋىنشا، جىل سوڭىنا دەيىن اپاتتى جاعدايداعى ءتورت مەكتەپتىڭ ماسەلەسىن شەشۋ جوسپارلانعان.
«الدىمەن ارنايى ماماندار عيماراتتىڭ تەحنيكالىق جاعدايىن تەكسەرەدى. ەگەر مەكتەپ اپاتتى دەپ تانىلسا، وقۋشىلار ۋاقىتشا باسقا عيماراتقا كوشىرىلەدى. كەيىن ەسكى عيمارات ءسۇرىلىپ، ونىڭ ورنىنا جاڭا مەكتەپ سالىنادى»، – دەدى ايقوجا ابسادىقوۆ.
