Elordadaǧy Qazaq Creative Hub alaŋynda «Zerdelı ūlt: oqu mädenietı jäne ūlt bolaşaǧy» taqyrybynda Aqsham Talks ziiatkerlık alaŋy öttı. Jobany «Elorda Aqparat» mediaserıktestıgı Memleket basşysy Qasym-Jomart Toqaevtyŋ kıtap oqu mädenietın damytu jäne zerdelı ūlt qalyptastyru jönındegı bastamasyn qoldau maqsatynda ūiymdastyrdy.
Is-şara barysynda «Elorda Aqparat» JŞS direktory Oljas Sydyqbek Aqsham Talks-tyŋ qoǧamdaǧy bılım, tehnologiia, saiasat, käsıp jäne tūlǧalyq damu sekıldı özektı mäselelerdı talqylaityn aşyq pıkırtalas alaŋy ekenın atap öttı. Sondai-aq, bügınnen bastap «Astana aqşamy» gazetınde oqu mädenietı men ūlttyq qūndylyqtardy nasihattaityn arnaiy Aqsham Talks aidary tūraqty türde jariialanatynyn jetkızdı.
Jiynda söz söilegen Senat deputaty Nūrtöre Jüsıp mūndai jobalardyŋ qoǧamnyŋ ruhani damuyna serpın beretının aityp, mazmūndy kezdesulerdıŋ köbeie tüsuıne tılektestık bıldırdı.
Kezdesuge halyqaralyq qūqyq mamany Almat İgenbaev, jasandy intellekt zertteuşısı Timur Bektūr, filolog-zertteuşı Aryn Qūnanbaiūly, pedagog Eskendır Bestai jäne ssenarist, kreativtı prodiuser Ramazan Failov qatysyp, kıtap oqu mädenietı men bılımnıŋ maŋyzy turaly oilaryn ortaǧa saldy.
Filolog-zertteuşı Aryn Qūnanbaiūly oqu daǧdysyn qalyptastyrudyŋ ǧylymi negızıne toqtalyp, balany kıtapqa bauludyŋ eŋ tiımdı joly – oǧan kıtapty dauystap oqyp beru ekenın aitty.
«Bala oqyp tumaidy, söilep tuady. Sondyqtan “kıtap oqy” degennen görı, “kel, kıtap oqyp bereiın” degen ūstanym maŋyzdy. Kıtap oqyp beretın ūlt qana kıtap oqityn ūltqa ainalady», – dedı spiker.
Jiyn soŋynda qatysuşylar oqu mädenietın qalyptastyru – tek bılım beru jüiesınıŋ emes, bükıl qoǧamnyŋ ortaq mındetı ekenıne toqtalyp, mūndai bastamalardyŋ zerdelı ūlt tärbieleuge yqpal etetının atap öttı.
