Astanada Mäjılıs Spikerı, «AMANAT» partiiasynyŋ Töraǧasy Erlan Qoşanovtyŋ töraǧalyǧymen partiianyŋ Saiasi keŋesınıŋ otyrysy öttı.
Onyŋ qorytyndysy boiynşa memlekettegı barlyq progressivtı qoǧamdyq-saiasi küşterdı Ädılettı jäne Progressivtı Qazaqstandy qūru jolynda küş bırıktırıp, jūmyla jūmys ısteuge şaqyrǧan mälımdeme qabyldandy. Otyrysqa Saiasi keŋes pen partiia Biurosynyŋ müşelerı, Ortalyq apparattyŋ basşylyǧy, öŋırlık filialdardyŋ töraǧalary men atqaruşy hatşylary qatysty.
Öz sözınde Erlan Qoşanov juyrda Memleket basşysy Memlekettık tu köteru räsımınde el damuynyŋ jaŋa baǧytyn aiqyndap, barlyq salauatty ärı progressivtı qoǧamdyq-saiasi küşterdı jalpyūlttyq qūndylyqtar men maqsattar töŋıregıne toptasuǧa şaqyrǧanyn atap öttı. Osyǧan bailanysty, «AMANAT» jauapty saiasi partiia retınde Memleket basşysynyŋ ündeuın tolyq qoldaidy jäne eldı damytuǧa baǧyttalǧan auqymdy prezidenttık kün tärtıbın jüzege asyru jolynda eŋbek etuge daiyn barlyq küştermen öz äleuetın bırıktıruge daiyn.
«Bügın bız osy tarihi kezeŋnıŋ maŋyzyn tereŋ tüsınuımız kerek. Jaŋa Konstitusiianyŋ qabyldanuymen Täuelsız Qazaqstannyŋ jaŋa däuırı bastaldy. Eşqandai asyra sılteusız aitar bolsaq, būl – halqymyz qoldaǧan Prezidentımızdıŋ asa ırı jetıstıgı ärı saiasi jeŋısı. Endı bızdıŋ aldymyzda jaŋa Konstitusiiada belgılengen barlyq maqsatty jüzege asyru mındetı tūr. Būl – jalǧyz atqaruǧa kelmeitın kürdelı jūmys. Ol bızden jūdyryqtai jūmyludy, bırlık pen kelısımdı talap etedı. Bügın bız qoǧamǧa jauapkerşılık pen ūiymşyldyqtyŋ ülgısın körsetuımız qajet», – dedı Erlan Qoşanov.
Otyrys barysynda Mäjılıs deputaty Snejanna İmaşeva jaŋa Konstitusiia küşıne enuınıŋ tarihi maŋyzyn atap ötıp, qoǧamdyq-saiasi küşterdı memlekettı damytudyŋ strategiialyq mındetterı töŋıregınde toptasuǧa şaqyrdy. Almaty oblystyq filialynyŋ töraǧasy Quat Baiǧodjaev Prezident bastamaşy bolǧan reformalar öŋırlerdıŋ serpındı damuyna yqpal etıp, jürgızılıp jatqan özgerısterge degen azamattardyŋ senımın nyǧaityp otyrǧanyn aitty. Maŋǧystau oblystyq filialynyŋ jetekşısı Nūrbek Qarasaev memlekettıŋ auqymdy qoǧamdyq-saiasi jaŋǧyruy jaǧdaiynda qoǧamdyq kelısım men bırlıktı saqtaudyŋ maŋyzyna nazar audardy. Mäjılıs deputaty Erlan Sairov Ata Zaŋnyŋ küşıne enuı jaŋa saiasi kezeŋdı aşatynyn aityp, el täuelsızdıgın nyǧaitu jolynda küş-jıgerdı bırıktıruge şaqyrdy.
Foto: Äli Ǧalym
