قاماۋدا جازىقسىز جاتقان وركەن ەرزاتتىڭ اپكەسى جۇرەك تەبىرەنتەر جازبا جاريالادى.
بۇعان دەيىن "ادىرنا" ۇلتتىق پورالى قاماۋداعى بۇل جىگىت جايىندا ماقالا جاريالاعان بولاتىن. ماقالا تاقىرىبى: ""باۋىرىمدى اكەتكەلى ۇيقى دا، كۇلكى دە قاشتى مەنەن": قازۇۋ تۇلەگى جازىقسىز قاماۋعا الىندى". سىلتەمەسى: https://adyrna.kz/post/100495. تومەندە وركەننىڭ اپكەسى ارداق ەرزاتتىڭ جازباسى بەرىلىپ وتىر:
وسىنداي جاعدايدى تەك كينودان عانا كورىپ ەدىم. مەن قوعامدىق قورعاۋشى رەتىندە بۇگىن باۋىرىممەن 15 كۇننەن بەرى العاش رەت كەزدەستىم... كەزدەستىم ەمەس، سويلەستىم دەۋگە بولاتىن شىعار. سەبەبى، داۋىس وتكىزبەيتىن اينا ءبولىپ تۇردى ارامىزدى.
العاشقى سۇراعىم: "ۇردى ما، سوقتى ما، قىسىم بولدى ما؟"- دەدىم.
- ادي، ۋايىمداما دەپ جاۋاپ بەردى. ىشتەي، امان بولعانىنا سانسىز شۇكىر دەدىم، جىلاپ سىقتاماي، ءتۇر بەرمەي شىداپ جاقسى كوڭىل-كۇيمەن سويلەستىم.
ءىشىم ورتەنىپ كەتتى. "اتا-اپام امان با، جيەنتايىمدى كىمگە قالدىردىڭ ..." - دەپ ءبىزدى ۋايىمداپ جاتىر.
مەيىرىمدى باۋىرىم مەنىڭ 
.
.مىڭ سۇراق ميىمدا مازا بەرەر ەمەس، بولاشاعىنان ءۇمىت كۇتتىرەتىن كەنجەتايىمىز، جالعىز باۋىرىمنىڭ ەندىگى جاعدايى نە بولماق؟! اقيقات قاشان ورىن الادى، باۋىرىم قاشان مىنا كۇدىكتەن ارىلىپ ورتامىزعا ورالادى؟!
باۋىرىم ادىلەتتىلىكتەن ءالى دە ءۇمىتى بارىن ايتتى. بارلىعى جاقسى جاعىنان وڭ شەشىممەن بولار. مەن شىدايمىن ءارى بارلىعى ءادىل بولىپ مەنىڭ كىناسىز ەكەنىم دالەلدەنەدى دەپ سەنىم ءبىلدىرىپ: "مەن اقپىن، مەن ءۇشىن ۇيالماڭدار"- دەدى.
ارينە، بوتام، ءبىز ارقاشان وزىڭمەن ماقتانامىز. بۇل كۇندەردە وتەر، ادىلەتتى سوت وكىلدەرىنە سەنىم بىلدىرەمىز.
مەن باۋىرىما كۇش بەرەمىن بە دەپ ويلاپ ەدىم، قايتا ماعان باۋىرىم كۇش بەردى...
قۇرمەتتى پروكۋراتۋرا قىزمەتكەرلەرى، تەرگەۋشى پروكۋرور، ايىپتاۋشى، كوميسسيا مۇشەلەرى، قوعامنىڭ بەلسەندى مۇشەلەرى سىزدەردەن وتىنەرىم، باۋىرىم ەرزات وركەنگە (28.01.2022ج) ىستەمەگەن ءىسى ءۇشىن كۇدىكتى رەتىندە قاراماي، تەزىرەك ونىڭ كىناسىزدىگىن انىقتاپ بوساتۋلارىڭىزدى سۇرايمىن.
ۋايىمداپ جاتقان بارشا جاقىندارىنا، دوستارىنا، تانىستارىنا اماندىعىن جەتكىزۋدى ايتتى.
(وركەننىڭ اپكەسى ارداقتىڭ جازباسى)
رەداكتسيادان:
قۇزىرەتتى ورگانداردان ءىستىڭ اق-قاراسى انىقتالىپ، جازىقسىز جاپا شەگىپ وتىرعان وركەننىڭ تەزىرەك بوستىندىققا شىعۋىن سۇرايمىز. كوزى اشىق، كوكىرەگى وياۋ، ءبىلىمدى، ءىلىمدى وركەن سياقتى ازاماتتاردان باسبۇزارلىق، توناۋشىلىق، تەرروريستىك ءتارىزدى زۇلىمدىقتاردىڭ شىقپاسى ايتپاسا دا تۇسىنىكتى. بولاشاعىنان ءۇمىت كۇتتىرەر جاستىڭ تەزىرەك بوساپ شىعىپ، تۋىستارىمەن قاۋىشۋى ەل كەلەشەگى ءۇشىن دە ماڭىزدى دەپ ەسەپتەيمىز.
"ادىرنا" ۇلتتىق پورتالى
