رەسەيدىڭ سانكت-پەتەربۋرگ قالاسىنداعى لەنين اۋداندىق سوتى سوعىسقا قارسى ۇرانداعان قازاقستان ازاماتىنا ايىپپۇل سالدى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
ول رەسەي اسكەرىن «قارالادى» دەگەن ايىپ بويىنشا اكىمشىلىك جاۋاپقا تارتىلعان. 52 جاستاعى نۇرلان اقىنجانوۆقا 30 مىڭ رۋبل كولەمىندە ايىپپۇل سالدى. بۇل تۋرالى سانكت-پەتەربۋرگ قالالىق سوتىنىڭ ءباسپاسوز قىزمەتى حابارلادى.
مالىمەتكە سايكەس، اقىنجانوۆ سوت وتىرىسىنا قاتىسپاعان. ءباسپاسوز قىزمەتىنىڭ مالىمەتىنشە، اكىمشىلىك حاتتاما 30 قاراشا كۇنى كەشكە ول «شوك» راديوسىنىڭ كەڭسەسىنە كىرگەننەن كەيىن تولتىرىلعان. ول كەزدە ستۋديادا «ۆەچە» باسپاسىنىڭ رەداكتورى گلەب ستافەەۆ سۇحبات بەرىپ جاتقان. ال اتالعان باسپا رەسەيدىڭ ۋكرايناداعى سوعىسىن قولدايتىن ونىمدەر شىعارۋمەن تانىلعان.
گلەب ستافەەۆتىڭ ايتۋىنشا، اقىنجانوۆ ينتەرنەتتەن ونىڭ سۇحبات بەرەتىنى تۋرالى حابارلامانى كورىپ، ستۋدياعا ادەيى كەلگەن. ونىڭ سوزىنشە، ازامات كەنەتتەن ستۋدياعا باسىپ كىرىپ، جۇرگىزۋشىگە قول كوتەرىپ، «قازىر ءبارىن جارىپ جىبەرەمىن» دەپ قورقىتقان. الايدا ايتىلعان سوزدەر ىسكە اسپاعان.
"ول ايتارىن ايتىپ بولعان سوڭ، پوليتسيا قىزمەتكەرلەرىنە ءوزى بەرىلدى", – دەدى ستافەەۆ.
ونىڭ مالىمدەۋىنشە، اقىنجانوۆ رەسەي پرەزيدەنتى ۆلاديمير ءپۋتيننىڭ ساياساتىنا قارسىلىق ءبىلدىرىپ، ۋكراينانى «باۋىرلاس ەل» دەپ اتاپ، قاقتىعىسقا قاتىستى ءوز پىكىرىن ايتقان.
نۇرلان اقىنجانوۆ رەسەي اۋماعىنا 2025 جىلدىڭ تامىز ايىنىڭ سوڭىندا تۋريست رەتىندە بارعان جانە سانكت-پەتەربۋرگ قالاسىندا تۇرعان. بۇعان دەيىن، 15 قازاندا، ول «پيتەر FM» راديوستانتسياسىنىڭ كەڭسەسىنە ءوزىن «كۋرەرمىن» دەپ تانىستىرىپ كىرىپ، سوعىسقا قارسى ۇراندار ايتقاننان كەيىن ۇستالعان. سول كەزدە وعان «ۇساق بۇزاقىلىق» بابى بويىنشا دا اكىمشىلىك حاتتاما تولتىرىلعانى حابارلانعان.
