Reseidıŋ Sankt-Peterburg qalasyndaǧy Lenin audandyq soty soǧysqa qarsy ūrandaǧan Qazaqstan azamatyna aiyppūl saldy, dep habarlaidy "Adyrna" ūlttyq portaly Azattyq radiosyna sıltep.
Ol Resei äskerın «qaralady» degen aiyp boiynşa äkımşılık jauapqa tartylǧan. 52 jastaǧy Nūrlan Aqynjanovqa 30 myŋ rubl kölemınde aiyppūl saldy. Būl turaly Sankt-Peterburg qalalyq sotynyŋ baspasöz qyzmetı habarlady.
Mälımetke säikes, Aqynjanov sot otyrysyna qatyspaǧan. Baspasöz qyzmetınıŋ mälımetınşe, äkımşılık hattama 30 qaraşa künı keşke ol «Şok» radiosynyŋ keŋsesıne kırgennen keiın toltyrylǧan. Ol kezde studiiada «Veche» baspasynyŋ redaktory Gleb Stafeev sūhbat berıp jatqan. Al atalǧan baspa Reseidıŋ Ukrainadaǧy soǧysyn qoldaityn önımder şyǧarumen tanylǧan.
Gleb Stafeevtıŋ aituynşa, Aqynjanov internetten onyŋ sūhbat beretını turaly habarlamany körıp, studiiaǧa ädeiı kelgen. Onyŋ sözınşe, azamat kenetten studiiaǧa basyp kırıp, jürgızuşıge qol köterıp, «qazır bärın jaryp jıberemın» dep qorqytqan. Alaida aitylǧan sözder ıske aspaǧan.
"Ol aitaryn aityp bolǧan soŋ, polisiia qyzmetkerlerıne özı berıldı", – dedı Stafeev.
Onyŋ mälımdeuınşe, Aqynjanov Resei prezidentı Vladimir Putinnıŋ saiasatyna qarsylyq bıldırıp, Ukrainany «bauyrlas el» dep atap, qaqtyǧysqa qatysty öz pıkırın aitqan.
Nūrlan Aqynjanov Resei aumaǧyna 2025 jyldyŋ tamyz aiynyŋ soŋynda turist retınde barǧan jäne Sankt-Peterburg qalasynda tūrǧan. Būǧan deiın, 15 qazanda, ol «Piter FM» radiostansiiasynyŋ keŋsesıne özın «kurermın» dep tanystyryp kırıp, soǧysqa qarsy ūrandar aitqannan keiın ūstalǧan. Sol kezde oǧan «ūsaq būzaqylyq» baby boiynşa da äkımşılık hattama toltyrylǧany habarlanǧan.
