شىمكەنت قالاسىندا نۇراي سەرىكبايدىڭ قازاسىنا قاتىستى قىلمىستىق ءىس بويىنشا باستى سوت تالقىلاۋى باستالدى، دەپ حابارلايدى "ادىرنا" ۇلتتىق پورتالى.
سوت وتىرىسىندا ايىپتالۋشى شەرحان ايماحاننان جاۋاپ الىندى. سوتتالۋشىنىڭ ايتۋىنشا، ول نۇراي سەرىكبايمەن 2025 جىلدىڭ شىلدە ايىنان باستاپ قىز-جىگىت رەتىندە كەزدەسكەن.
«نۇرايعا قولما-قول اقشا بەرىپ تۇردىم. شىمكەنتتە جۇرگەن كەزىندە 350 مىڭ تەڭگە بەردىم. ودان بولەك ءتۇرلى سىيلىقتار سىيلادىم. ول مەنىڭ اي سايىن الماتىعا بارىپ تۇرۋىمدى تالاپ ەتتى»، – دەدى ايىپتالۋشى سوت بارىسىندا.
ونىڭ سوزىنشە، 2025 جىلدىڭ 4 قازانىندا ەكەۋى شاڭىراق كوتەرۋگە شەشىم قابىلداپ، الماتىدان شىمكەنتكە بارعان. ايىپتالۋشى قىزدى ۇيىنە الىپ بارعاننان كەيىن ودان قولحات جازدىرعانىن ايتىپ، مۇنى ۇلتتىق سالت-داستۇرمەن بايلانىستىردى.
سوتتالۋشى مارقۇمنىڭ اناسى مەن اعالارى ولاردىڭ قارىم-قاتىناسى تۋرالى بىلگەنىن اتاپ ءوتتى. ايىپتالۋشىنىڭ ايتۋىنشا، 2026 جىلدىڭ 11 قاڭتارىندا ول نۇراي سەرىكبايمەن اراداعى قارىم-قاتىناستى توقتاتۋ ماقساتىندا كەزدەسۋگە شاقىرعان.
«ساقينانى قايتارىپ، قوشتاسقىم كەلدى. "ايىرىلىسامىز" دەگەن كەزدە نۇراي اشۋلانىپ، ساقينانى لاقتىرىپ جىبەردى. كەيىن ماعان پىشاق سۇقتى. مەن قالتامداعى كىشكەنتاي پىشاقتى بەرىپ، "ۇرعانشا، پىشاقتا" دەدىم. وسىدان كەيىن نە بولعانى ەسىمدە جوق»، – دەدى ول.
قازىر سوتتا ايىپتالۋشىدان جاۋاپ الۋ جالعاسىپ جاتىر.
ەسكە سالايىق، 1997 جىلى تۋعان شەرحان ايماحانعا قازاقستان رەسپۋبليكاسى قىلمىستىق كودەكسىنىڭ نەكەگە تۇرۋعا ماجبۇرلەۋ، ستالكينگ جانە اسا قاتىگەزدىكپەن ادام ءولتىرۋ باپتارى بويىنشا ايىپ تاعىلعان. ايىپتالۋشىنىڭ كىناسى زاڭدى كۇشىنە ەنگەن سوت ۇكىمى شىققانعا دەيىن دالەلدەنگەن بولىپ سانالمايدى.
