Şymkent qalasynda Nūrai Serıkbaidyŋ qazasyna qatysty qylmystyq ıs boiynşa basty sot talqylauy bastaldy, dep habarlaidy "Adyrna" ūlttyq portaly.
Sot otyrysynda aiyptaluşy Şerhan Aimahannan jauap alyndy. Sottaluşynyŋ aituynşa, ol Nūrai Serıkbaimen 2025 jyldyŋ şılde aiynan bastap qyz-jıgıt retınde kezdesken.
«Nūraiǧa qolma-qol aqşa berıp tūrdym. Şymkentte jürgen kezınde 350 myŋ teŋge berdım. Odan bölek türlı syilyqtar syiladym. Ol menıŋ ai saiyn Almatyǧa baryp tūruymdy talap ettı», – dedı aiyptaluşy sot barysynda.
Onyŋ sözınşe, 2025 jyldyŋ 4 qazanynda ekeuı şaŋyraq köteruge şeşım qabyldap, Almatydan Şymkentke barǧan. Aiyptaluşy qyzdy üiıne alyp barǧannan keiın odan qolhat jazdyrǧanyn aityp, mūny ūlttyq salt-dästürmen bailanystyrdy.
Sottaluşy marqūmnyŋ anasy men aǧalary olardyŋ qarym-qatynasy turaly bılgenın atap öttı. Aiyptaluşynyŋ aituynşa, 2026 jyldyŋ 11 qaŋtarynda ol Nūrai Serıkbaimen aradaǧy qarym-qatynasty toqtatu maqsatynda kezdesuge şaqyrǧan.
«Saqinany qaitaryp, qoştasqym keldı. "Aiyrylysamyz" degen kezde Nūrai aşulanyp, saqinany laqtyryp jıberdı. Keiın maǧan pyşaq sūqty. Men qaltamdaǧy kışkentai pyşaqty berıp, "ūrǧanşa, pyşaqta" dedım. Osydan keiın ne bolǧany esımde joq», – dedı ol.
Qazır sotta aiyptaluşydan jauap alu jalǧasyp jatyr.
Eske salaiyq, 1997 jyly tuǧan Şerhan Aimahanǧa Qazaqstan Respublikasy Qylmystyq kodeksınıŋ nekege tūruǧa mäjbürleu, stalking jäne asa qatygezdıkpen adam öltıru baptary boiynşa aiyp taǧylǧan. Aiyptaluşynyŋ kınäsı zaŋdy küşıne engen sot ükımı şyqqanǧa deiın däleldengen bolyp sanalmaidy.
