2025 جىلى قازاقستاندا ادام ساۋداسىنا قاتىستى 164 قىلمىس تىركەلگەن. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ء«ىىم دەرەكتەرى بويىنشا، 2025 جىلى ادام ساۋداسىنا قاتىستى 164 قىلمىس تىركەلگەن. «STOP ترافيك» وپەراتسياسى اياسىندا رەيدتەردىڭ 4 كەزەڭى وتكىزىلدى. ۇقك شەكارا قىزمەتى زاڭسىز كوشى-قوننىڭ 29 ارناسىنىڭ جولىن كەستى، ال استانا مەن الماتى حالىقارالىق اۋەجايلارىندا شەتەلدىك ازاماتتاردىڭ ءۇش كامەلەتكە تولماعان قازاقستاندىقتى زاڭسىز الىپ كەتۋىنە جول بەرىلمەدى»،- دەلىنگەن حابارلامادا.
ادام ساۋداسىنا قارسى ءىس-قيمىل جونىندەگى ۆەدومستۆوارالىق كوميسسيانىڭ كەزەكتى وتىرىسى مينيستر اسقاربەك ەرتاەۆتىڭ توراعالىعىمەن ءوتتى. قاتىسۋشىلار 2025 جىلعى جۇمىستىڭ قورىتىندىسىن شىعارىپ، توراعالىقتى ەكى جىل مەرزىمگە ءىىم-گە بەرۋ ماسەلەسىن تالقىلادى.
2025 جىلى ادام ساۋداسىنان زارداپ شەككەن 171 ادامعا، ونىڭ ىشىندە شەتەل ازاماتتارىنا ارنايى الەۋمەتتىك قىزمەتتەر كورسەتىلگەن. ولارعا ۋاقىتشا باسپانا، مەديتسينالىق جانە پسيحولوگيالىق كومەك، سونداي-اق جۇمىسقا ورنالاسۋعا جانە قۇجاتتارىن قالپىنا كەلتىرۋگە جاردەم بەرىلگەن.
ەڭبەك جانە حالىقتى الەۋمەتتىك قورعاۋ ءمينيسترىنىڭ ايتۋىنشا، 2024 جىلدىڭ شىلدەسىندە قابىلدانعان «ادام ساۋداسىنا قارسى ءىس-قيمىل تۋرالى» ارنايى زاڭ جابىرلەنۋشىلەردىڭ قۇقىقتارىن قورعاۋدىڭ جاڭا جۇيەسىن قالىپتاستىرۋعا مۇمكىندىك بەرگەن.
«ادامعا باعدارلانعان ءتاسىل – ەندى ءبىزدىڭ باستى نازارىمىزدا. تەك 2025 جىلدىڭ وزىندە ادام ساۋداسىنىڭ 171 قۇربانىنا ارناۋلى الەۋمەتتىك قىزمەتتەر كورسەتىلدى. بۇگىن ءبىز ودان ءارى ۆەدومستۆوارالىق جۇمىس ءۇشىن بەرىك ىرگەتاس قالاي وتىرىپ، توراعالىق ەتۋ ەستافەتاسىن ءىىم-دەگى ارىپتەستەرىمىزگە بەرەمىز»، – دەدى اسقاربەك ەرتاەۆ.
