الماتىنىڭ المالى اۋداندىق سوتى «Elge Qaitaru» قورىنىڭ جەتەكشىسى، زاڭگەر ورازالى ەرجانوۆتى كىنالى دەپ تانىپ، 4 جىلعا باس بوستاندىعىن شەكتەۋ جازاسىن تاعايىندادى، دەپ حابارلايدى "ادىرنا".
وعان پروباتسيالىق باقىلاۋ قويىلىپ، 5 جىلعا قوعامدىق قىزمەتپەن اينالىسۋىنا تىيىم سالىندى.
سوت ونى قىلمىستىق كودەكستىڭ 150-بابى 2-بولىگى – سايلاۋ پروتسەسىنە كەدەرگى كەلتىرۋ بويىنشا ايىپتى دەپ تاپتى. ايىپقا سايكەس، ەرجانوۆ 2026 جىلعى رەفەرەندۋم الدىندا الەۋمەتتىك جەلىدە بويكوت جاريالاۋعا شاقىرعان جازبا تاراتقان جانە ازاماتتاردى ورتالىق سايلاۋ كوميسسياسىنا ءوتىنىش بەرۋگە ۇندەگەن.
سونىمەن قاتار ايىپتاۋدا ونىڭ Facebook پاراقشاسىندا رەفەرەندۋمعا قاتىستى بەلسەندىلىك تانىتىپ، كونستيتۋتسيا جوباسىنا بايلانىستى جيىن وتكىزۋگە شاقىرعانى كورسەتىلگەن. تەرگەۋ نۇسقاسىنا ساي، بۇل ارەكەتتەر سايلاۋ پروتسەسىنە ىقپال ەتۋ رەتىندە باعالانعان.
پروكۋرور سوتتان ءدال وسى جازانى سۇراعان. ەرجانوۆ وزىنە تاعىلعان ايىپتى مويىندامايتىنىن ايتىپ، ۇكىممەن كەلىسپەيتىنىن مالىمدەدى جانە اپەللياتسيا بەرەتىنىن جەتكىزدى. سوڭعى سوزىندە ول رەفەرەندۋمعا بايلانىستى ۇستانىمىن «قىلمىس ەمەس» دەپ اتاپ، وزىنە تاعىلعان ايىپتى ءسوز بوستاندىعىنا قىسىم رەتىندە باعالادى. ونىڭ ايتۋىنشا، بۇل ءىس تەك ونى ەمەس، كونستيتۋتسياداعى پىكىر ءبىلدىرۋ قۇقىعىن دا قوزعايدى.
ول بيىل اقپان ايىنىڭ سوڭىندا ۇستالىپ، باستاپقىدا 10 تاۋلىككە قامالعان. كەيىن ەكى ايلىق قاماۋعا سانكتسيا بەرىلگەن، ال رەفەرەندۋم وتكەننەن كەيىن ۇيقاماققا اۋىستىرىلعان. ايىپتاۋ جاعى ونىڭ الەۋمەتتىك جەلىدەگى جازبالارى مەن ۇندەۋلەرىن نەگىز ەتكەن.
ۇكىم ازىرگە زاڭدى كۇشىنە ەنگەن جوق، قورعاۋشى تاراپ اپەللياتسياعا دايىندالىپ جاتىر.
