ماڭعىستاۋ وبلىسىندا حالىق ەمشىلىگى كەزىندە ناۋقاستىڭ ولىمىنە قاتىستى ءىس اپەللياتسيالىق ساتىدا قايتا قارالىپ، سوتتالعان ايەلگە تاعايىندالعان جازا جەڭىلدەتىلدى. بۇل تۋرالى Lada.kz باسىلىمى جازدى، دەپ حابارلايدى “ادىرنا”.
اقپاراتقا سايكەس، مۇنايلى اۋداندىق سوتى 2026 جىلعى 19 ناۋرىزدا ب. ەسىمدى تۇرعىندى ابايسىزدا ادام ولىمىنە سەبەپكەر بولۋ بابى بويىنشا (قر قك 104-بابىنىڭ 1-بولىگى) كىنالى دەپ تانىدى. 49 جاستاعى ايەل اقتاۋ قالاسىنداعى №1 قالالىق ەمحانادا مەدبيكە بولىپ جۇمىس ىستەي وتىرىپ، ءتيىستى ءبىلىمى مەن ليتسەنزياسى جوق بولسا دا، ۇيىندە «حالىق ەمشىلىگى» قىزمەتىن كورسەتكەن.
سوت مالىمەتىنشە، 2025 جىلعى 26 قاراشادا شامامەن ساعات 20:30-دا مۇنايلى اۋدانىنىڭ ماڭعىستاۋ اۋىلىنداعى ءوز ۇيىندە ول كەلۋشىنى «ەمدەۋ» بارىسىندا ونىڭ تاماعىن قولىمەن قىسىپ قالعان. سونىڭ سالدارىنان ەر ادام وقيعا ورنىندا كوز جۇمعان.
ءبىرىنشى ساتىداعى سوت ب.-عا 1 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى. جازا ەڭ تومەنگى قاۋىپسىزدىك مەكەمەسىندە وتەلۋى ءتيىس ەدى. الايدا سوتتالعاننىڭ كامەلەتكە تولماعان بالاسى بار ەكەنىن ەسكەرىپ، قر قك-ءنىڭ 74-بابى نەگىزىندە جازا وتەۋ كەيىنگە قالدىرىلعان.
تاعايىندالعان جازاعا كەلىسپەگەن قورعاۋشىلار اپەللياتسيالىق شاعىم ءتۇسىردى. ولار سوتتالعاننىڭ كىناسىن تولىق مويىنداعانىن جانە جابىرلەنۋشى تاراپتىڭ كەشىرىم بەرگەنىن العا تارتىپ، باس بوستاندىعىنان ايىرۋ جازاسىن جەڭىلىرەك جازاعا اۋىستىرۋدى سۇرادى.
ماڭعىستاۋ وبلىستىق سوتىنىڭ قىلمىستىق ىستەر جونىندەگى سوت القاسى ءىستى قاراپ، جازا تاعايىنداۋ كەزىندە جەڭىلدەتەتىن ءمان-جايلار تولىق ەسكەرىلمەگەن دەگەن قورىتىندىعا كەلدى. قىلمىس اۋىرلىعى از ساناتقا جاتقىزىلىپ، باپ سانكتسياسىندا بالاما جازا تۇرلەرى قاراستىرىلعانى اتاپ ءوتىلدى.
ناتيجەسىندە اپەللياتسيالىق ساتى ۇكىمدى جازا بولىگىندە وزگەرتتى. ايەلگە 1 جىل 6 اي مەرزىمگە باس بوستاندىعىن شەكتەۋ جازاسى تاعايىندالدى جانە پروباتسيالىق باقىلاۋ بەلگىلەندى: وعان ۋاكىلەتتى ورگانداردى حاباردار ەتپەي تۇرعىلىقتى جەرىن جانە جۇمىس ورنىن اۋىستىرۋعا، ويىن-ساۋىق ورىندارى مەن الكوگول تۇتىناتىن جەرلەرگە بارۋعا، سونداي-اق تۇنگى ۋاقىتتا (22:00-دەن 06:00-گە دەيىن) ۇيدەن شىعۋعا تىيىم سالىندى. سونىمەن قاتار، سوت وعان ەمشىلىكپەن (بالگەرلىكپەن) اينالىسۋعا دا تىيىم سالدى.
