باس پروكۋراتۋرا اباي وبلىسىنداعى ورتكە قاتىستى ءىستى سوتقا جولدادى

اباي وبلىسىنداعى ءىرى ورمان ورتىنە قاتىستى قىلمىستىق ءىس اياقتالىپ، سوتقا جولداندى. بۇل تۋرالى باس پروكۋراتۋرانىڭ ءباسپاسوز قىزمەتى مالىمدەدى, دەپ حابارلايدى «ادىرنا» ۇلتتىق پورتالى.

«تەرگەپ-تەكسەرۋ ناتيجەسىندە، ءورتتىڭ شىعۋ سەبەبى قىلقانجاپىراقتى اعاشتىڭ دىڭىنە تۇسكەن نايزاعاي (قۇرعاق نايزاعاي), جەر جامىلعىسىنىڭ تۇتانۋىنا سەبەپ بولعان. اتالعان نۇسقا ساراپشى، مامان قورىتىندىلارىمەن، فوتو/ۆيدەو تۇسىرىلىمدەرىمەن، كۋالاردىڭ ايعاقتارى جانە قىلمىستىق ءىستىڭ باسقا دا قۇجاتتارىمەن راستالادى. ءورت كەزىندە «سەمەي-ورمانى» رەزەرۆاتى جانە نوۆوشۋلبينسك فيليالىنىڭ باسشىلىعى وزدەرىنە زاڭمەن جۇكتەلگەن ءورت ءسوندىرۋ وكىلەتتىكتەرىن ورىنداماعان، جاعدايدى تەرىس باعالاعان جانە ءورت ءسوندىرۋ كەزىندە قاۋىپسىزدىك ەرەجەلەرىنىڭ ساقتالۋىن قامتاماسىز ەتپەگەن، ناتيجەسىندە 14 تۇلعانىڭ ولىمىنە اكەلىپ سوققان»، - دەلىنگەن حابارلامادا.

سونداي-اق «سەمەي-ورمانى» رەزەرۆاتى جانە نوۆوشۋلبينسك فيليالى باسشىلىعىنىڭ ءىس-ارەكەتتەرى قىلمىستىق كودەكستىڭ 292 بابىنىڭ 3 بولىگىمەن سارالانىپ ء(ورت قاۋiپسiزدiگi تالاپتارىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوعۋ، 5 جىلدان 10 جىلعا دەيىن باس بوستاندىعىنان ايىرۋ جازاسى كوزدەلگەن), «ۇيقاماق» تۇرىندەگى بۇلتارتپاۋ شاراسى تاعايىندالعان. بۇدان بولەك، ەكولوگيا جانە تابيعي رەسۋرستار جانە توتەنشە جاعدايلار مينيسترلىكتەرىنىڭ لاۋازىمدى تۇلعالارىنىڭ ارەكەتسىزدىك دەرەگىمەن تىركەلگەن سوتقا دەيىنگى تەرگەپ-تەكسەرۋ جالعاسىپ جاتىر. مامانداردىڭ قورىتىندىلارى الىنعان سوڭ بارلىق لاۋازىمدى تۇلعالاردىڭ ارەكەتتەرىنە قۇقىقتىق باعا بەرىلەتىن بولادى. ەستەرىڭىزدە بولسا، 2023 جىلدىڭ ماۋسىمىندا اباي وبلىسىنىڭ باتپاەۆ ورمان شارۋاشىلىعى «سەمەي ورمانى» مەملەكەتتىك ورمان تابيعي رەزەرۆاتىندا» ورمان ورتەنگەن بولاتىن. سالدارىنان 60 مىڭ گەكتار ورمان قورى جويىلىپ، «سەمەي-ورمانى» رەزەرۆاتى نوۆوشۋلبينسك فيليالىنىڭ 14 قىزمەتكەرى قازا بولعانىن حابارلاعان ەدىك.  

«ادىرنا» ۇلتتىق پورتالى