Qazaqstandyq sportşylar älem chempionatynda tarihi jüldege qol jetkızdı, dep habarlaidy “Adyrna” tılşısı.
Äzerbaijan astanasy Bakude ötıp jatqan nysana közdeuden 53-şı älem chempionatynda Qazaqstan qorjynyna 2 medal tüstı.
Äielder arasynda 10 metrden jyljymaly nysana közdeudıŋ finalyna ekı qazaqstandyq – Zuhra İrnazarova men Aleksandra Saduakasova şyǧyp, bas jüldenı sarapqa saldy. Tartysty ötken aqtyq synda Zuhra otandasy Aleksandradan 6-3 esebımen basym tüsıp, älem chempiony atandy.
Al qola ukrainalyq Galina Avramenkoǧa būiyrdy.
Būǧan deiın eresekter arasynda qazaqstandyq mergender älem chempionatynda jülde almaǧan. Barlyq jetıstık jasöspırımder men jastar deŋgeiınde tırkelgen. Al sportşy qyzdar bırden qos medaldy qanjyǧaǧa bailady.
Bakude kümıs jüldege ie bolǧan Aleksandra Saduakasova byltyr Fransiiada ötken jastar arasyndaǧy älem chempionatynda top jarǧanyn eske sala keteiık.
«Bügıngı kün qarbalasqa toly boldy. Bız osy chempionatqa ūzaq uaqyt daiyndaldyq. Är oǧymdy aldyŋǧysynan jaqsy, däl atuǧa tyrystym. Bar taktikam osy boldy. Jarysqa deiıngı jattyǧulardyŋ arqasynda osy jüldege qol jetkızdım»,-dedı Zuhra Sportty damytu direksiiasynyŋ baspasöz qyzmetıne bergen sūhbatynda.
Qazır Qazaqstan qūramasynyŋ enşısınde 3 jülde bar. Bırneşe kün būryn stend atudyŋ trap baǧdarlamadasynda Mariia Dmitrienko men Daniil Pochivalov üzdık üştıktı tüiındegenın eske salamyz. Bakudaǧy doda 1 qyrküiekte märesıne jetedı.
