تۇركىستاندا مەديتسينا قىزمەتكەرلەرىنىڭ قۇقىعىن قورعاپ جۇرگەن كەزىندە پسيحياتريالىق اۋرۋحاناعا ءماجبۇرلى تۇردە جاتقىزىلعانىن مالىمدەگەن مۇحامماد ومىربەك توعىز ايعا سوزىلعان سوت داۋىنىڭ العاشقى ناتيجەسىنە قول جەتكىزدى. شىمكەنت قالالىق سوتىنىڭ اپەللياتسيالىق القاسى ونىڭ شاعىمىن قاناعاتتاندىرىپ، تالاپ ارىزىن قايتارۋ تۋرالى ءبىرىنشى ساتىداعى سوتتىڭ ۇيعارىمىنىڭ كۇشىن جويدى. بۇل تۋرالى ول «جاس الاشقا» ايتتى، دەپ حابارلايدى «ادىرنا» ءتىلشىسى.
مۇحامماد ومىربەكتىڭ سوزىنشە، شىمكەنت قالالىق سوتىنىڭ اكىمشىلىك ىستەر جونىندەگى سوت القاسى ءبىرىنشى ساتىداعى سوتتىڭ تالاپ قويۋ ارىزىن قايتارۋ تۋرالى شەشىمىن جويعان. وسىلايشا، ونىڭ ءىسىن سوتتا ءمانى بويىنشا قاراۋعا مۇمكىندىك تۋعان.
الايدا اپەللياتسيالىق سوتتىڭ بۇل شەشىمى مۇحامماد ومىربەكتىڭ پسيحياتريالىق دياگنوزى زاڭسىز دەپ تانىلدى نەمەسە ونىڭ بارلىق تالابى قاناعاتتاندىرىلدى دەگەندى بىلدىرمەيدى. قازىرگى تاڭدا سوت تالاپ ارىزىن قاراۋعا جول اشقان. ال نەگىزگى داۋ بويىنشا تۇپكىلىكتى شەشىم ءالى قابىلدانعان جوق.
تۇركىستان تۇرعىنى مۇحامماد ومىربەك 5 جىل بويى فەلدشەر بولىپ جۇمىس ىستەگەن جانە مەديتسينا قىزمەتكەرلەرىنىڭ ەڭبەك جاعدايى مەن الەۋمەتتىك ماسەلەلەرىنە نازار اۋدارۋعا تىرىسقان.
2025 جىلدىڭ قاراشاسىندا ول «103 قازاقستان» اتتى WhatsApp توبىن اشىپ، فەلدشەرلەردىڭ جالاقىسىن كوتەرۋ، زەينەت جاسىن قايتا قاراۋ، تۇرعىن ءۇي ماسەلەسىن شەشۋ جانە ەڭبەك قۇقىقتارىن قورعاۋ جونىندە ۇسىنىستار كوتەرگەن.
ءوزىنىڭ ايتۋىنشا، وسى قوعامدىق بەلسەندىلىگىنەن كەيىن وعان جەرگىلىكتى بيلىك پەن قۇقىق قورعاۋ ورگاندارى تاراپىنان قىسىم كورسەتىلە باستاعان. ول پوليتسيا قىزمەتكەرلەرى مەن اكىمدىكتىڭ ىشكى ساياسات ءبولىمى تاراپىنان قىسىم كورگەنىن مالىمدەگەن. ال جەرگىلىكتى اكىمدىك بۇل ايىپتاۋلاردى جوققا شىعارعان.
وقيعانىڭ ەڭ داۋلى تۇسى 2025 جىلعى 5 جەلتوقساندا باستالعان. مۇحامماد ومىربەكتىڭ ايتۋىنشا، سول كۇنى پوليتسيا قىزمەتكەرلەرى ونى پسيحياتريالىق مەديتسينالىق مەكەمەگە جەتكىزگەن. ناتيجەسىندە ول 37 كۇن بويى پسيحياتريالىق اۋرۋحانادا جاتقان.
وعان F22 – «سانا بۇزىلىسى» دياگنوزى قويىلعان. بۇل دياگنوزدىڭ نەگىزدىلىگىنە كۇمان كەلتىرگەن ومىربەك ءوزىنىڭ پسيحيكالىق جاعدايىنا قاتىستى تاۋەلسىز ساراپتامادان وتۋگە شەشىم قابىلداعان.
ول كەيىن استانا قالاسىندا پسيحياتريالىق تەكسەرۋدەن ءوتىپ، پسيحيكالىق اۋىتقۋى جوق ەكەنى تۋرالى قورىتىندى العانىن مالىمدەگەن. وسىلايشا، ءبىر ازاماتتىڭ پسيحيكالىق دەنساۋلىعىنا قاتىستى ەكى ءتۇرلى مەديتسينالىق قورىتىندى تۋرالى ماسەلە تۋىنداعان.
ەر ادام تۇركىستانداعى پسيحياتريالىق مەكەمەنىڭ ارەكەتتەرىمەن كەلىسپەي، سوتقا جۇگىنگەن. ونىڭ نەگىزگى تالاپتارىنىڭ قاتارىندا قويىلعان دياگنوزدىڭ زاڭدىلىعىن داۋلاۋ جانە پسيحياتريالىق ەسەپتەن شىعارۋ ماسەلەلەرى بولعان. الايدا ءبىرىنشى ساتىداعى سوت ونىڭ تالاپ قويۋ ارىزىن قايتارۋ تۋرالى ۇيعارىم شىعارعان. سونىڭ سالدارىنان نەگىزگى داۋ ءمانى بويىنشا قارالماعان.
مۇحامماد ومىربەك بۇل شەشىممەن كەلىسپەي، اپەللياتسيالىق شاعىم تۇسىرگەن. ەندى شىمكەنت قالالىق سوتىنىڭ اكىمشىلىك ىستەر جونىندەگى سوت القاسى ءبىرىنشى ساتىداعى سوتتىڭ ۇيعارىمىن جويعان.
اپەللياتسيالىق سوتتان كەيىن مۇحامماد ومىربەك كۇرەسىن جالعاستىراتىنىن مالىمدەدى.
