مباپپەنىڭ ءازىلى قىتايدا بويكوتقا ۇلاستى. سپورتشى كەشىرىم سۇرادى

قىتاي تەلەارناسى يسپانيا چەمپيوناتىنىڭ ماتچتارى مەن فرانتسۋز فۋتبولشىسى كيليان مباپپە قاتىسقان جارنامالىق ماتەريالداردى كورسەتۋدەن باس تارتتى. بۇل تۋرالى Pengpai پورتالى جازدى، دەپ حابارلايدى «ادىرنا» ءتىلشىسى.

«مباپپەنىڭ قىتايعا قاتىستى ورەسكەل تەرىس ارەكەتتەرىنە بايلانىستى CCTV تەلەارناسى 27 قازاننان باستاپ لا ليگا مەن مباپپەگە قاتىستى ماتچتاردىڭ ترانسلياتسياسىن تولىعىمەن توقتاتتى»، – دەلىنگەن حابارلامادا.

26 قازاندا The Bridge شوۋىندا مباپپەمەن سۇحبات جاريالانعان ەدى. فۋتبولشىدان ءوزى تۋرالى جاسالعان ەڭ كۇلكىلى مەمدى اتاۋ سۇرالعان. ول ءوزىنىڭ بەت-بەينەسى «الدەبىر جىگىتتىڭ، شاماسى، قىتاي ديكتاتورىنىڭ» سۋرەتىنە قويىلعان بەينەنى ەسىنە العان.

قىتايدا ماو تسزەدۋن ەل تاريحىنداعى ماڭىزدى تۇلعالاردىڭ ءبىرى سانالادى. سوندىقتان وعان قاتىستى ءازىل-قالجىڭ جاساۋعا جول بەرىلمەيدى. مباپپەنىڭ ءسوزى قىتايدىڭ الەۋمەتتىك جەلىلەرىندە نارازىلىق تۋدىرىپ، فۋتبولشىنى بويكوتتاۋعا شاقىرعان جازبالار تاراعان. 27 قازاندا Weibo جەلىسىندەگى ەڭ كوپ تالقىلانعان ون تاقىرىپتىڭ بەسەۋى مباپپەگە قاتىستى بولعان.

Dongpeng سۋسىن ءوندىرۋشىسى، Mengniu ءسۇت ونىمدەرىن شىعاراتىن كومپانياسى جانە Milkground ىرىمشىك ءوندىرۋشىسى فۋتبولشىمەن جاسالعان كەلىسىمشارتتارىن بۇزعان. ولار قىتايلىقتاردىڭ ۇلتتىق سەزىمىنە تيەتىن سوزدەردى قابىلدامايتىنىن مالىمدەگەن.

Global Times باسىلىمىنىڭ مالىمەتىنشە، Dior, On جانە Hublot برەندتەرى Weibo جەلىسىندەگى پاراقشالارىنان مباپپە قاتىسقان جاريالانىمداردى الىپ تاستاعان. سونداي-اق فۋتبولشىنىڭ Weibo جانە RedNote جەلىلەرىندەگى اككاۋنتتارىنا جازىلۋ مۇمكىندىگى شەكتەلگەن. بۇعان قاۋىمداستىق ەرەجەلەرىنىڭ بۇزىلۋى سەبەپ بولعان.

بۇل شۋدان كەيىن مباپپە X الەۋمەتتىك جەلىسىندەگى پاراقشاسىندا كەشىرىم سۇرادى.

«مەنىڭ پىكىرىم ويلانباي ايتىلدى. ەندى ونىڭ قىتايداعى كوپتەگەن ادامنىڭ جانە الەمنىڭ تۇكپىر-تۇكپىرىندەگى قىتاي قاۋىمداستىقتارى وكىلدەرىنىڭ كوڭىلىنە تيگەنىن ءتۇسىندىم. سوزدەرىمە رەنجىگەن بارشا ادامنان كەشىرىم سۇرايمىن. مەنىڭ مۇنداي نيەتىم بولعان جوق. قىتاي حالقىنا جانە ونىڭ تاريحىنا زور قۇرمەتپەن قارايمىن. ايتقان سوزدەرىمە وكىنەمىن»،– دەدى سپورتشى.

China Media Group وكىلدەرى كەشىرىمنىڭ نازارعا الىنعانىن، الايدا مباپپەنىڭ الداعى ارەكەتتەرى دە باعالاناتىنىن مالىمدەدى. لا ليگا دا قىتايلىق جانكۇيەرلەردەن كەشىرىم سۇراپ، قىتايداعى سەرىكتەستەرىمەن جاعدايدى رەتتەۋگە ۋادە بەردى.

قىتاي سىرتقى ىستەر مينيسترلىگى دە بۇل ماسەلەگە قاتىستى پىكىر ءبىلدىردى. مينيسترلىك وكىلى گو تسزياكۋن قىتاي حالقىنىڭ سەزىمىنە تيەتىن سوزدەر مەن ارەكەتتەر قوعامنىڭ قارسىلىعىنا ءسوزسىز تاپ بولاتىنىن ايتتى.