اقش پرەزيدەنتى دونالد ترامپ ۆەنەسۋەلانىڭ اقش قۇرامىنا 51-شتات رەتىندە قوسىلۋى مۇمكىن ەكەنىن ايتتى. بۇل تۋرالى The Hill باسىلىمى جازدى، دەپ حابارلايدى «ادىرنا» ءتىلشىسى.
مەملەكەت باسشىسى بۇل تۋرالى 27 قازاندا تەحاس شتاتىنداعى كورپۋس-كريستي قالاسىندا جاقتاستارىنىڭ الدىندا سويلەگەن سوزىندە مالىمدەگەن.
«مۇمكىن، ءبىر كۇنى، ءتىپتى جاقىن ارادا، ۆەنەسۋەلا گۇلدەنگەن 51-شتاتقا اينالار. بۇل ابدەن مۇمكىن. سولاي جاسايىق. ۆەنەسۋەلانى 51-شتاتقا اينالدىرايىق»، – دەدى دونالد ترامپ.
سونداي-اق ول ەلدە پرەزيدەنتتىڭ ورنىنا گۋبەرناتور سايلاۋعا بولاتىنىن بولجادى. اقش باسشىسى بۇل مالىمدەمەلەرىن ەكى ەل اراسىنداعى مۇناي سالاسىنداعى ىنتىماقتاستىقتىڭ كەڭەيۋىمەن بايلانىستىردى. ونىڭ ايتۋىنشا، ۆەنەسۋەلا اقش-قا 1 ميلليون باررەل مۇناي جونەلتكەن. ال قول جەتكىزىلگەن ۋاعدالاستىقتار ينۆەستيتسيانى ودان ءارى ارتتىرۋ مەن مۇناي ءوندىرۋدى دامىتۋعا باعىتتالعان.
باسىلىمنىڭ جازۋىنشا، ترامپ بۇعان دەيىن دە ۆەنەسۋەلانىڭ اقش قۇرامىنا قوسىلۋى مۇمكىن ەكەنى تۋرالى پىكىر بىلدىرگەن. الايدا ەلدىڭ ۋاقىتشا پرەزيدەنتى دەلسي رودريگەس بۇل ۇسىنىستى قابىلداماي، ۆەنەسۋەلا ءوزىنىڭ ەگەمەندىگى مەن تاۋەلسىزدىگىن قورعاۋعا نيەتتى ەكەنىن مالىمدەگەن.
ايتا كەتەيىك، 27 قازاندا اقوردا دونالد ترامپتىڭ قازاقستان پرەزيدەنتى قاسىم-جومارت توقاەۆقا جولداعان جەدەلحاتىنىڭ مازمۇنىن جاريالاعان ەدى. وندا اقش پرەزيدەنتى جەلتوقسان ايىندا وتەتىن G20 سامميتىندە كەزدەسۋدى اسىعا كۇتىپ جۇرگەنىن اتاپ وتكەن.
