اق ءۇي تايۆان توڭىرەگىندەگى جاعدايدى تالقىلاۋ ءۇشىن قىتايدىڭ ۆاشينگتونداعى ەلشىسىن شاقىردى. بۇل تۋرالى 5 تامىزدا The Washington Post باسىلىمى جاريالادى، دەپ حابارلايدى “ادىرنا” ۇلتتىق پورتالى.
باسىلىمنىڭ مالىمەتىنشە، ديپلوماتتى اقش اكىمشىلىگى ءبىر كۇن بۇرىن، بەيسەنبى كۇنى شاقىرعان.
«قىتايدىڭ تۇنگى ارەكەتتەرىنەن كەيىن ءبىز قحر-نىڭ ارانداتۋشىلىق ارەكەتتەرىن كورسەتۋ ءۇشىن ەلشى تسين گاندى اق ۇيگە شاقىردىق. ءبىز قىتايدىڭ جاۋاپسىز جانە تايۆان بۇعازىندا بەيبىتشىلىك پەن تۇراقتىلىقتى ساقتاۋ جونىندەگى كوپتەن بەرگى ماقساتىمىزعا قايشى كەلەتىن اسكەري ارەكەتتەرىن ايىپتايمىز»، - دەدى اق ءۇيدىڭ ءباسپاسوز حاتشىسى دجون كيربي گازەتكە بەرگەن تۇسىنىكتەمەسىندە.
ونىڭ ايتۋىنشا، اق ءۇي دە وكىلدەر پالاتاسىنىڭ سپيكەرى نەنسي پەلوسيدىڭ ساپارى اياسىندا اقش-تىڭ ايماقتا داعدارىستى قالامايتىنىن بىلدىرگىسى كەلگەن.
امەريكالىق تاراپ تسينگە اقش-تىڭ «ءبىر قىتاي» ساياساتىندا ەشتەڭە وزگەرمەگەنىن باسا ايتىپ، بارلىق بايلانىس جولدارىن ساقتاعىسى كەلەتىندەرىن قۋاتتادى. الايدا ۆاشينگتون بەيجىڭنىڭ ارەكەتىن قابىلداۋعا بولمايدى دەپ سانايدى.
ەسكە سالايىق، پەلوسي ارالعا 2 تامىزدا كەلدى جانە ونىڭ ساپارىن «اقش-تىڭ تايۆان دەموكراتياسىن قولداۋعا بەرىلگەندىگىنىڭ ايعاعى» دەپ اتادى. بۇل اقش كونگرەسى وكىلدەر پالاتاسى سپيكەرىنىڭ تايۆانعا سوڭعى 25 جىلداعى العاشقى رەسمي ساپارى. پەكين ۆاشينگتونعا ءۇزىلدى-كەسىلدى نارازىلىق ءبىلدىرىپ، جاۋاپ شارالارىنا ۋادە بەردى.
4 تامىزدا قىتاي حالىق ازاتتىق ارمياسى تايۆان توڭىرەگىندە ءۇش كۇندىك اۋقىمدى اتىس جاتتىعۋلارىن باستادى. سونىمەن بىرگە Reuters اقپارات كوزىنە سىلتەمە جاساپ، تايۆان قىتاي اۋە كۇشتەرىنىڭ وقۋ-جاتتىعۋلارداعى ارەكەتتەرىن باقىلاۋ ءۇشىن زىمىراندىق كەشەندەردى ورنالاستىرىپ جاتقانىن جازدى.
قىتاي سىرتقى ىستەر مينيسترلىگى 5 تامىزدا قىتايدىڭ پەلوسي مەن ونىڭ جاقىن تۋىستارىنا سانكتسيا سالاتىنىن حابارلادى.
ايتا كەتەيىك، تايۆان قىتايدىڭ ءبىر بولىگى. بىراق تالاي ونجىلدىقتار بويى تاۋەلسىز مەملەكەت رەتىندە ءومىر ءسۇرىپ كەلەدى. قحر ۇكىمەتى مەن ونىڭ ارالدىق پروۆينتسياسى اراسىنداعى رەسمي قارىم-قاتىناس 1949 جىلى ءۇزىلدى، بايلانىستار 1980 جىلداردىڭ اياعىندا قالپىنا كەلتىرىلدى.
”ادىرنا” ۇلتتىق پورتالى
