بۇگىن، 2 قاراشادا يراننىڭ سىرتقى ىستەر ءمينيسترى ابباس اراگچي اشحابادقا باردى. بۇل تۋرالى IRNA اقپارات اگەنتتىگى جازدى، دەپ حابارلايدى «ادىرنا» ءتىلشىسى.
ءبىر كۇندىك ساپار بارىسىندا تاراپتار ەكىجاقتى قارىم-قاتىناستاردى، وڭىرلىك جانە حالىقارالىق ماسەلەلەردى، سونداي-اق يران مەن تۇركىمەنستان اراسىنداعى ساياسي جانە ەكونوميكالىق ىنتىماقتاستىقتى نىعايتۋ جولدارىن تالقىلاماق.
26 قازاندا ابباس اراگچي تۇركىمەنستاننىڭ سىرتقى ىستەر ءمينيسترى راشيد مەرەدوۆپەن تەلەفون ارقىلى سويلەسكەن ەدى. اڭگىمە بارىسىندا تاراپتار وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماسقان. سونداي-اق ايماقتاعى تۇراقتىلىق پەن قاۋىپسىزدىكتى قامتاماسىز ەتۋ ءۇشىن ديپلوماتيالىق كونسۋلتاتسيالاردىڭ ماڭىزدىلىعىن اتاپ وتكەن.
بۇعان دەيىن، 28 قازاندا تۇكىمەنستان سىرتقى ىستەر ءمينيسترىنىڭ ورىنباسارى احمەت گۋربانوۆ اشحابادتا يران سىرتقى ىستەر ءمينيسترىنىڭ ەكونوميكالىق ديپلوماتيا جونىندەگى ورىنباسارى حاميد گانباريمەن كەزدەسكەن. كەزدەسۋ بارىسىندا تاراپتار ساۋدا-ەكونوميكالىق بايلانىستاردى دامىتۋ، ەنەرگەتيكا جانە ونەركاسىپ سالالارىنداعى ىنتىماقتاستىق ماسەلەلەرىن قاراستىرعان.
