بولگارياداعى پرەزيدەنت سايلاۋىنىڭ ەكىنشى كەزەڭىندە ماسكەۋمەن ديالوگ ورناتۋدى قولدايتىن جانە ۋكرايناعا اسكەري كومەك كورسەتۋگە قارسى كوزقاراس ۇستاناتىن پرەزيدەنت مىندەتىن اتقارۋشى يليانا يوتوۆا جەڭىسكە جەتتى. بۇل تۋرالى BBC جازدى، دەپ حابارلايدى «ادىرنا» ءتىلشىسى.
جەرگىلىكتى ورتالىق سايلاۋ كوميسسياسىنىڭ مالىمەتىنشە، ول باتىسشىل وپپوزيتسيا قولداعان بانكير، بۇرىنعى ۋاقىتشا ۇكىمەت باسشىسى اندرەي گيۋروۆتان باسىم تۇسكەن. ەكزيتپول ناتيجەلەرى دە يوتوۆانىڭ جەڭىسىن بولجاعان.
سايلاۋ حاتتامالارىنىڭ 100 پايىزعا جۋىعى وڭدەلگەننەن كەيىن يليانا يوتوۆا 57,66 پايىز داۋىس جيناعان. ال اندرەي گيۋروۆتى سايلاۋشىلاردىڭ 39,38 پايىزى قولداعان. سايلاۋدىڭ تۇپكىلىكتى قورىتىندىسى دۇيسەنبى كۇنى جاريالانۋى ءتيىس.
پرەزيدەنت سايلاۋىنىڭ ەكىنشى كەزەڭى جەكسەنبى كۇنى ءوتتى. نەگىزىنەن سالتاناتتى سيپاتقا يە بولعانىمەن، ماڭىزدى مەملەكەتتىك لاۋازىمعا ماسكەۋمەن ديالوگ ورناتۋدى جاقتايتىن يليانا يوتوۆا مەن ناتو-مەن ىنتىماقتاستىقتى قولدايتىن اندرەي گيۋروۆ ۇمىتكەر بولدى. يوتوۆا ۆيتسە-پرەزيدەنتتىككە جۋرناليست ءارى زاڭگەر كيريلل ۆىلچەۆپەن بىرگە سايلاۋعا ءتۇستى.
پرەزيدەنت سايلاۋى بولگاريانىڭ قارا تەڭىز جاعالاۋىندا قازان ايى بويى ساۋدا كەمەلەرىنە ەكيپاجسىز جاۋىنگەرلىك كاتەرلەردىڭ شابۋىل جاساعانى تۋرالى حابارلار اياسىندا ءوتتى. رەسەيگە قاتىسى بار دەگەن كۇدىككە ىلىنگەن بۇل شابۋىلدار حالىقارالىق دەڭگەيدە ايىپتالىپ، ۋكرايناداعى سوعىستىڭ اۋقىمى كەڭەيۋى مۇمكىن دەگەن الاڭداۋشىلىق تۋعىزدى.
سايلاۋدىڭ ءبىرىنشى كەزەڭى وتكەن دەمالىس كۇندەرى ءوتىپ، وعان 27 ۇمىتكەر قاتىستى. قازىرگى ۋاقىتتا پرەزيدەنت مىندەتىن اتقارىپ وتىرعان يوتوۆا ۋاقىتشا ۇكىمەتتىڭ بۇرىنعى باسشىسى گيۋروۆتان ءسال باسىم تۇسكەنىمەن، 50 پايىزدىق مەجەدەن اسا المادى. ءبىرىنشى كەزەڭدەگى سايلاۋشىلاردىڭ قاتىسۋ كورسەتكىشى رەكوردتىق تومەن دەڭگەيدە بولىپ، نەبارى 23 پايىزدى قۇرادى.
ءبىرىنشى كەزەڭدە يوتوۆا 35 پايىز، ال گيۋروۆ 32 پايىز داۋىس جينادى. بۇل ايىرماشىلىق قوعامدىق پىكىر ساۋالنامالارىندا بولجانعان كورسەتكىشتەن الدەقايدا از بولدى.
ساۋالنامالار يوتوۆا قارسىلاسىنان 20 پايىزدىق تارماققا وزادى دەپ بولجاعان ەدى. الايدا ءبىرىنشى كەزەڭدە گيۋروۆ ودان نەبارى 42 مىڭ داۋىسقا قالىپ قويدى.
بولگاريا پرەزيدەنتى – مەملەكەت باسشىسى. پرەزيدەنتتىڭ قىزمەتى نەگىزىنەن سالتاناتتى سيپاتتا بولعانىمەن، ول حالىقارالىق قاتىناستاردا ەلدىڭ اتىنان وكىلدىك ەتەدى جانە قارۋلى كۇشتەردىڭ جوعارعى باس قولباسشىسى سانالادى. سونداي-اق پرەزيدەنت پارلامەنت قابىلداعان زاڭدارعا ۆەتو قويۋ قۇقىعىنا يە، الايدا پارلامەنت دەپۋتاتتارىنىڭ باسىم كوپشىلىگىنىڭ داۋىسىمەن بۇل ۆەتونى ەڭسەرۋگە بولادى. بۇعان قوسا، سىرتقى بارلاۋ قىزمەتى دە پرەزيدەنتتىڭ قاراماعىندا.
