يزرايلدە پارلامەنتتىك سايلاۋدا بيۋللەتەندەردىڭ 85,6%-ى ەسەپتەلگەننەن كەيىن ەلدىڭ قازىرگى پرەمەر-ءمينيسترى بينيامين نەتانياحۋدى قولدايتىن بلوك بۇرىنعى باس شتاب باستىعى گادي ايزەنكوت باستاعان وپپوزيتسيالىق بلوكتان كوبىرەك داۋىس جيناپ وتىر. الايدا بۇل ناتيجە ۇكىمەت قۇرۋعا جەتكىلىكسىز، دەپ حابارلايدى «ادىرنا» ءتىلشىسى BBC-گە سىلتەمە جاساپ.
الدىن الا مالىمەت بويىنشا، كنەسسەتتەگى اراب پارتيالارى رەكوردتىق ورىنعا يە بولۋى مۇمكىن. ولار كواليتسيا قۇرۋدا شەشۋشى ءرول اتقارا الار ەدى. الايدا نەتانياحۋ دا، ايزەنكوت تا ولارمەن ىنتىماقتاسۋعا دايىن ەمەس.
28 قازاندا تۇسكە قاراي ءيزرايلدىڭ ورتالىق سايلاۋ كوميسسياسى بيۋللەتەندەردىڭ شامامەن 93%-ى، ياعني جالپى داۋىس سانىنىڭ 85,6%-ى سانالعانىن حابارلادى. ازىرگە «قوس كونۆەرتتەگى داۋىستار» دەپ اتالاتىن قاشىقتان بەرىلگەن بيۋللەتەندەر ەسەپتەلمەگەن. ولار الداعى بىرنەشە كۇندە جالپى داۋىس سانىنا قوسىلادى دەپ كۇتىلۋدە.
قاشىقتان داۋىس بەرۋگە تەك ەرەكشە جاعدايلاردا رۇقسات ەتىلەدى. بۇل شەتەلدە جۇمىس ىستەيتىن ديپلوماتتارعا، سونداي-اق سوتتالعاندارعا، مەديتسينا قىزمەتكەرلەرىنە جانە سوزىلمالى اۋرۋى بار ادامدارعا قاتىستى. دەگەنمەن، مۇنداي تاسىلمەن داۋىس بەرەتىندەردىڭ باسىم بولىگى – اسكەري قىزمەتكەرلەر.
ورتالىق سايلاۋ كوميسسياسىنىڭ باعالاۋىنشا، بيىلعى سايلاۋدا قاشىقتان داۋىس بەرۋگە ارنالعان 430 مىڭنان 480 مىڭعا دەيىن بيۋللەتەن تاپسىرىلعان.
سوڭعى مالىمەتتەر بويىنشا نەتانياحۋ بلوگى كنەسسەتتەن 53 ورىنعا، ونىڭ ىشىندە «ليكۋد» پارتياسىنا 26 مانداتقا ءۇمىت ارتا الادى. ال وپپوزيتسيالىق بلوك 48 ورىن يەلەنۋى مۇمكىن. ەكى اراب پارتياسى ءوز تاريحىنداعى ەڭ جوعارى ناتيجەگە قول جەتكىزىپ، 19 ورىن الۋى ىقتيمال.
داۋىستاردى ساناۋ تاعى بىرنەشە كۇنگە، بولجام بويىنشا، 30 قازانعا دەيىن جالعاسادى.
سايلاۋدىڭ رەسمي قورىتىندىسى داۋىس بەرۋدەن ءبىر اپتا وتكەن سوڭ، 4 قاراشادا جاريالانادى.
رەسمي ناتيجەلەر جاريالانعان سوڭ يزرايل پرەزيدەنتى يتسحاك گەرتسوگ پارتيا جەتەكشىلەرىمەن كەڭەسىپ، ۇكىمەت قۇرۋعا مۇمكىندىگى جوعارى دەپ سانايتىن ۇمىتكەردى تاڭدايدى. تاڭدالعان ساياساتكەرگە كواليتسيا قۇرۋ جونىندە كەلىسسوز جۇرگىزۋ ءۇشىن 28 كۇن بەرىلەدى. قاجەت بولعان جاعدايدا پرەزيدەنت بۇل مەرزىمدى 42 كۇنگە دەيىن ۇزارتۋى مۇمكىن.
