Jaidarman جوباسىنىڭ جەتەكشىسى ءارى قوعام بەلسەندىسى ەسەن ەلەۋكەن پارلامەنت سايلاۋىنا تۇسۋگە نيەتتى ەكەنىن جاسىرمادى. ول halyquni پورتالىنىڭ «سۇراۋى بار» Youtube ارناسىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
ول پرەزيدەنت سايلاۋى بولماسا دا ءماجىلىس دەپۋتاتى بولۋعا نيەتتى.
“شاكىرتتەرىمنىڭ اراسىندا اۋديتورياسى 1 ميلليوننان اساتىن، Jaidarman-نان شىققان 30-دان اسا جىگىت بار. بىراق وسى جولعى سايلاۋ ەمەس، مۇمكىن كىشىگىرىم ۇيىم، ءماسليحات نەمەسە ماجىلىسكە بارامىن دەگەن وي بولعان. پرايمەريزگە دە تۇسەمىن دەدىم. بىراق وعان دايىندىق كەرەك. قارجىلاي ەمەس. سايلاۋعا ءتۇسۋ ءۇشىن الدىن الا ءبىر ەتاپتاردان ءوتۋىم كەرەك”، - دەدى ەسەن ەلەۋكەن.
ەسەن ەلەۋكەن الەۋمەتتىك جەلىدە دە بەلسەندى. ءتۇرلى ساياسي، قوعامدىق، الەۋمەتتىك تاقىرىپتاردا اۋقىمدى پوستار جازىپ وتىرادى. سوندىقتان بولار، وعان پارلامەنتتىك سايلاۋعا تۇسۋگە ۇسىنىس جاسالعان.
“كەلەر جىلعا پارلامەنتكە ۇسىنىس ءتۇسىپ، نەگە تۇسپەسكە دەگەن اڭگىمە دە بولىپ جاتىر. مەنىڭ عانا ەمەس، جالپى مەنى قولدايتىن توپتىڭ يدەياسى. زەلەنسكي پرەزيدەنت بولعاننان كەيىن بارلىعى: «نەگە بىزدەن دە شىقپاسقا؟» دەيدى. زەلەنسكي كۇنى كەشە پايدا بولعان جوق قوي. وعان 15 جىلداي ۋاقىتى كەتتى. دايىندادى. جالپى، ۋكراينانىڭ قوعامى بىزدەن بولەك. ولار ەۋروپاعا جاقىن، ال ءبىز مىنا جاقتا. ەكى الىپ كورشىمىز بار دەگەندەي. كوڭىلگە قارايمىز”، - دەيدى Jaidarman جوباسىنىڭ جەتەكشىسى.
