Jaidarman jobasynyń jetekshisi ári qoǵam belsendisi Esen Eleýken parlament saılaýyna túsýge nıetti ekenin jasyrmady. Ol halyquni portalynyń «Suraýy bar» Youtube arnasyna bergen suhbatynda aıtty, dep habarlaıdy “Adyrna” ulttyq portaly.
Ol prezıdent saılaýy bolmasa da Májilis depýtaty bolýǵa nıetti.
“Shákirtterimniń arasynda aýdıtorııasy 1 mıllıonnan asatyn, Jaidarman-nan shyqqan 30-dan asa jigit bar. Biraq osy jolǵy saılaý emes, múmkin kishigirim uıym, máslıhat nemese Májiliske baramyn degen oı bolǵan. Praımerızge de túsemin dedim. Biraq oǵan daıyndyq kerek. Qarjylaı emes. Saılaýǵa túsý úshin aldyn ala bir etaptardan ótýim kerek”, - dedi Esen Eleýken.
Esen Eleýken áleýmettik jelide de belsendi. Túrli saıası, qoǵamdyq, áleýmettik taqyryptarda aýqymdy postar jazyp otyrady. Sondyqtan bolar, oǵan parlamenttik saılaýǵa túsýge usynys jasalǵan.
“Keler jylǵa Parlamentke usynys túsip, nege túspeske degen áńgime de bolyp jatyr. Meniń ǵana emes, jalpy meni qoldaıtyn toptyń ıdeıasy. Zelenskıı prezıdent bolǵannan keıin barlyǵy: «Nege bizden de shyqpasqa?» deıdi. Zelenskıı kúni keshe paıda bolǵan joq qoı. Oǵan 15 jyldaı ýaqyty ketti. Daıyndady. Jalpy, Ýkraınanyń qoǵamy bizden bólek. Olar Eýropaǵa jaqyn, al biz myna jaqta. Eki alyp kórshimiz bar degendeı. Kóńilge qaraımyz”, - deıdi Jaidarman jobasynyń jetekshisi.
