17 شىلدەدە اتىراۋ جانە ۇلىتاۋ وبلىستىق ءماسليحاتتارىنىڭ دەپۋتاتتارى كەزەكتەن تىس جيىن وتكىزىپ، ءوڭىر باسشىلارىن سايلايدى، دەپ حابارلايدى "ادىرنا" ۇلتتىق پورتالى.
اتىراۋ وبلىسىنداعى داۋىس بەرۋ تاڭعى ساعات 09:30-دا باستالادى. ءماسليحات دەپۋتاتتارىن تىركەۋ ءبىر جارىم ساعات بۇرىن جۇرگىزىلەدى. ال ۇلىتاۋ وبلىسىندا اكىمدى سايلاۋ ءراسىمى ساعات 11:00-گە جوسپارلانعان، دەپۋتاتتاردى تىركەۋ ساعات 10:00-دە باستالادى.
قازىر اتىراۋ وبلىسىن سەرىك شاپكەنوۆ باسقارىپ وتىر. ول بۇل قىزمەتكە 2022 جىلى كەلگەن. بۇعان دەيىن ەڭبەك جانە حالىقتى الەۋمەتتىك قورعاۋ سالاسىندا ءتۇرلى باسشىلىق قىزمەتتەردى اتقارعان.
ال ۇلىتاۋ وبلىسىنىڭ اكىمى داستان رىسپەكوۆ بۇل لاۋازىمعا 2024 جىلدىڭ كۇزىندە تاعايىندالعان. ەڭبەك جولىندا وبلىس اكىمىنىڭ ورىنباسارى جانە پرەزيدەنت اكىمشىلىگىنىڭ مەملەكەتتىك ينسپەكتورى قىزمەتتەرىن اتقارعان.
جاڭا اكىمدەردى سايلاۋ ناتيجەسى ءماسليحات وتىرىستارى اياقتالعاننان كەيىن بەلگىلى بولادى.
