اقتوبە وبلىسىندا جۇمىس كەزىندە دەنەسىنىڭ 85%-ىن كۇيىك شالعان 46 جاستاعى تەمىرجولشى جۇباندىق دۇيسەمباەۆ اۋرۋحانادا كوز جۇمدى، دەپ حابارلايدى “ادىرنا” كتك-عا سىلتەپ.
وقيعا 13 قازاندا شالقار اۋدانىندا بولعان. جۇمىسشىلار 200 ليترلىك بوشكەدەن بەنزين قۇيىپ جاتقان كەزدە ءورت شىققان. سالدارىنان 23 جانە 46 جاستاعى ەكى ەر ادام اۋىر كۇيىك العان.
زارداپ شەككەندەر سانيتاريالىق اۆياتسيامەن اۋداننان اقتوبە قالاسىنا جەتكىزىلگەن. ولاردى ەمدەۋگە استانادان دا ماماندار تارتىلعان.
اقتوبەدەگى №1 كوپبەيىندى اۋرۋحانانىڭ تراۆماتولوگ دارىگەرى نۇرلان ابىشەۆتىڭ ايتۋىنشا، زارداپ شەككەندەردىڭ ءبىرى ەلورداعا جەتكىزىلگەن. ال دەنەسىنىڭ 85%-ىن كۇيىك شالعان ەكىنشى ناۋقاستىڭ جاعدايى وتە اۋىر بولعان.
«ناۋقاستاردىڭ ءبىرىن سانيتاريالىق اۆياتسيامەن استاناعا جىبەردىك. ەكىنشى ناۋقاستىڭ دەنەسىنىڭ 85%-ى كۇيگەن. وكىنىشكە قاراي، ول قايتىس بولدى»، – دەدى دارىگەر.
قازىر وقيعاعا قاتىستى تەرگەۋ جالعاسىپ جاتىر.
