اقتوبە قالاسىندا «AMANAT» پارتياسىنىڭ «TURGYNDAR AMANATY» جوباسى اياسىندا اۋقىمدى وڭىرلىك فورۋم ءوتىپ، تۇرعىن ءۇي-كوممۋنالدىق شارۋاشىلىعى سالاسىنداعى جۇيەلى وزگەرىستەر، ناقتى ماسەلەلەر مەن ولاردى شەشۋدىڭ پراكتيكالىق تەتىكتەرى اشىق تالقىلاندى.
فورۋم الاڭىندا مەملەكەتتىك ورگاندار، دەپۋتاتتار، ميب پەن پيك توراعالارى العاش رەت كەڭەيتىلگەن فورماتتا تىكەلەي ديالوگ قۇردى.
ءىس-شارا اشىق فورماتتاعى پانەلدىك وتىرىستان باستالىپ، پلەنارلىق سەسسياعا ۇلاستى. وندا تۇرعىن ءۇي قورىن جاڭعىرتۋ، ينجەنەرلىك ينفراقۇرىلىمنىڭ توزۋى، تاريفتىك ساياسات، باسقارۋ نىساندارىنىڭ تيىمدىلىگى، كوندومينيۋم وبەكتىلەرىن تىركەۋ، كوممۋنالدىق قىزمەت ساپاسى جانە تۇرعىنداردىڭ تولەم ءتارتىبى سياقتى ءتۇيىنى تارقاماعان تۇيىتكىلدەردى اشىق تالقىعا ءتۇستى. ءوز كەزەگىندە جەرگىلىكتى اتقارۋشى ورگاندار بۇل ماسەلەلەر بويىنشا ناقتى تۇسىنىكتەمەلەر بەرىپ، بىرقاتار ماسەلەنى شەشۋ جولدارىن بەلگىلەدى.
پلەنارلىق وتىرىستا ءسوز العان ءوڭىر باسشىسى اسحات شاحاروۆ «TURGYNDAR AMANATY» جوباسىنىڭ تۇرعىن ءۇي-كوممۋنالدىق شارۋاشىلىعى سالاسىن دامىتۋعا جانە ازاماتتار ءۇشىن قولايلى ءارى قاۋىپسىز ورتا قالىپتاستىرۋعا سەرپىن بەرەتىنىن اتاپ ءوتتى.
«بۇگىنگى جيىن – ورتاق ماقساتقا جەتۋ جولىنداعى ناقتى قادامدارىمىزدىڭ ءبىرى. وتىرىستا كوتەرىلگەن بارلىق ماسەلە نازارعا الىنىپ، ولاردى شەشۋ بويىنشا ءتيىستى جۇمىستار جۇيەلى تۇردە جالعاسىن تابادى. ءاربىر ۇسىنىس سالالىق جوسپار مەن ءىس-شارالار بارىسىندا ەسكەرىلىپ، ونىڭ ورىندالۋى ءتيىستى مەملەكەتتىك ورگاندار باقىلاۋىندا بولادى. ورتاق مىندەتتەردى ورىنداۋدا جۇيەلى ءارى ناتيجەلى جۇمىس جۇرگىزۋ قاجەت»، – دەدى ول.
ال «AMANAT» پارتياسىنىڭ حاتشىسى ەرجان جىلقىباەۆ ءوز سوزىندە پارتيا باستاماسىمەن ىسكە قوسىلعان بۇل جوبا كوپپاتەرلى تۇرعىن ۇيلەردەگى جۇيەلى ماسەلەلەردى شەشۋدىڭ ناقتى قۇرالىنا اينالىپ وتىرعانىن اتاپ ءوتتى.
«بۇل باعىتتاعى وزگەرىستەر – تاريفتەر، اباتتاندىرۋ، جارىقتاندىرۋ، ليفتىلەر مەن قاۋىپسىزدىك – ءاربىر تۇرعىننىڭ كۇندەلىكتى ءومىر ساپاسىنا تىكەلەي اسەر ەتەدى. سوندىقتان ءبىز تەك تالقىلاۋمەن شەكتەلمەي، ناقتى شەشىمدەرگە كوشۋىمىز قاجەت. پارتيا ناقتى ناتيجەگە باعىتتالعان جۇيەلى جۇمىستى جالعاستىرادى»، – دەدى ول.
ءوز كەزەگىندە دەپۋتات ەكاتەرينا سمىشلياەۆا قاراۋسىز قالعان ۇيلەر ماسەلەسىنە توقتالىپ، اكىمدىكتەرگە ولاردى مەملەكەتتىك ۇيىمدار ارقىلى ۋاقىتشا باسقارۋ وكىلەتتىگى بەرىلگەنىن اتاپ ءوتتى. بۇل – الەۋمەتتىك تۇرعىدان ماڭىزدى شەشىم.
«جاڭا زاڭدا تۇرعىن ءۇي ينسپەكتسياسىمەن جانە كوممۋنالدىق قىزمەتتەرمەن ءوزارا ءىس-قيمىل رەگلامەنتتەرى ايقىن بەلگىلەندى. بىراق تاجىريبەدە ماسەلەلەر بار ەكەنىن كورىپ وتىرمىز. وسى تۇرعىدا ءبىزدىڭ جوبا نەگىزگى كوممۋنيكاتسيالىق الاڭ بولادى. ءاربىر توراعا، ءۇيدىڭ وكىلى باسقارۋعا قاتىستى ماسەلەلەر بويىنشا «AMANAT» پارتياسىنا جۇگىنە الادى جانە قاجەت بولعان جاعدايدا ءتيىستى قىزمەتتەرمەن تىكەلەي بايلانىس ۇيىمداستىرىلادى.
كادر ماسەلەسى دە پارتيانىڭ باستى نازارىندا. سالاعا كەلەتىن مامانداردىڭ بىلىكتىلىگىن ارتتىرۋ، سەرتيفيكاتتاۋ جۇيەسىن جەتىلدىرۋ جانە وقىتۋ ساپاسىن ارتتىرۋ – الداعى كەزەڭنىڭ نەگىزگى مىندەتتەرىنىڭ ءبىرى. ءبىز وقۋ جانە تەست ماتەريالدارىنىڭ ساپاسىن، سونداي-اق توراعالار ءۇشىن سەرتيفيكاتتاۋ قىزمەتتەرىنىڭ قولجەتىمدىلىگىن باقىلاۋ باعىتىندا جۇمىس جۇرگىزەمىز»، – دەدى دەپۋتات ەكاتەرينا سمىشلياەۆا.
ءماجىلىس دەپۋتاتى قازىبەك الىشەۆ تۇرعىن ءۇي-كوممۋنالدىق شارۋاشىلىق سالاسىنداعى رەفورمالاردىڭ ءمانىن ەگجەي-تەگجەيلى ءتۇسىندىردى. ونىڭ ايتۋىنشا، «تۇرعىن ءۇي قاتىناستارى تۋرالى» زاڭداعى وزگەرىستەر بۇل سالانى تۇبەگەيلى جاڭعىرتۋعا باعىتتالعان.
ءىس-شارا بارىسىندا وڭىردەگى تۇرعىن ءۇي قورىنىڭ ناقتى جاعدايى جانە كەيىنگى جىلدارى جۇرگىزىلگەن جۇمىستار دا اشىق ايتىلدى. وبلىستا 12 ملرد تەڭگە كولەمىندە قارجى ءبولىنىپ، 255 تۇرعىن ۇيگە جوندەۋ جۇمىسى جۇرگىزىلگەن، سونداي-اق 223 ليفت جاڭارتىلعان. بۇدان بولەك باسقارۋ جۇيەسىن جاڭعىرتۋ باعىتىندا 331 ميب قۇرىلدى.
