«تازا قازاقستان» جالپىۇلتتىق باعدارلاماسى اياسىندا ق.جۇبانوۆ اتىنداعى اقتوبە وڭىرلىك ۋنيۆەرسيتەتىندە «ەكولوگيالىق تاربيە – تازا بولاشاق كەپىلى» اتتى ءىس-شارا ءوتتى.
ءىس-شارانىڭ ماقساتى – جاستاردىڭ ەكولوگيالىق ساۋاتتىلىعىن ارتتىرۋ، تابيعي بايلىقتاردى ساقتاۋ مادەنيەتىن قالىپتاستىرۋ، قورشاعان ورتاعا جاناشىرلىقپەن قاراۋدى ناسيحاتتاۋ جانە ەكولوگيالىق ماسەلەلەردى شەشۋدەگى ورتاق جاۋاپكەرشىلىكتى نىعايتۋ.
كەزدەسۋ بارىسىندا ەكولوگيا سالاسىنىڭ ماماندارى ستۋدەنتتەرگە «تازا قازاقستان» جالپىۇلتتىق باعدارلاماسىنىڭ نەگىزگى باعىتتارى، ماڭىزى مەن قوعامداعى ءرولى تۋرالى ءتۇسىندىردى. سونىمەن قاتار قورشاعان ورتانى قورعاۋ، قالدىقتاردى سۇرىپتاۋ، تابيعي رەسۋرستاردى ءتيىمدى پايدالانۋ جانە ەكولوگيالىق ادەتتەردى كۇندەلىكتى ومىردە قالىپتاستىرۋ ماسەلەلەرى تالقىلاندى.
تانىمدىق كەزدەسۋمەن قاتار ستۋدەنتتەر اراسىندا ماكۋلاتۋرا جيناۋ اكتسياسى ۇيىمداستىرىلدى. باستاما قاعاز قالدىقتارىن قايتا وڭدەۋ مادەنيەتىن قالىپتاستىرۋعا جانە تابيعي رەسۋرستاردى ۇنەمدەۋدىڭ ماڭىزىن تاجىريبە جۇزىندە كورسەتۋگە باعىتتالدى.
اقتوبە وبلىسى بويىنشا ەكولوگيا دەپارتامەنتىنىڭ باس مامانى، مەملەكەتتىك ەكولوگيالىق ينسپەكتور گۇلزات نۋرۋشەۆا ەكولوگيالىق مادەنيەتتى قالىپتاستىرۋدىڭ ماڭىزىن اتاپ ءوتتى.
— ەكولوگيالىق مادەنيەتتى قالىپتاستىرۋ جانە تابيعي رەسۋرستاردى ساقتاۋ – بارشامىزعا ورتاق مىندەت. «تازا قازاقستان» باعدارلاماسى اياسىندا جاستاردىڭ قورشاعان ورتانى قورعاۋعا بەلسەندى قاتىسۋى، ماكۋلاتۋرا جيناۋ سياقتى يگى باستامالاردى قولداۋى ەرەكشە ماڭىزعا يە. تابيعاتقا جاناشىرلىقپەن قاراۋ ءاربىر ازاماتتىڭ كۇندەلىكتى ومىرلىك ۇستانىمىنا اينالۋى ءتيىس، – دەدى ول.
ال ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ الەۋمەتتىك ماسەلەلەر جانە جاستار ساياساتى دەپارتامەنتىنىڭ باس مامانى داۋرەن ورازالين جاستاردىڭ ەكولوگيالىق تاربيەسىنە توقتالدى.
— جاستاردىڭ ەكولوگيالىق مادەنيەتىن قالىپتاستىرۋ جانە تابيعاتتى قورعاۋعا دەگەن جاۋاپكەرشىلىگىن ارتتىرۋ – تاربيە جۇمىسىنىڭ ماڭىزدى باعىتتارىنىڭ ءبىرى. بۇگىنگى ماكۋلاتۋرا جيناۋ باستاماسى ستۋدەنتتەردىڭ ەكولوگيالىق ماسەلەلەرگە بەيجاي قارامايتىنىن جانە قورشاعان ورتانى قورعاۋعا ناقتى ۇلەس قوسۋعا دايىن ەكەنىن كورسەتەدى. ءبىزدىڭ ماقساتىمىز – ەكولوگيالىق سانالى، تابيعاتقا جاناشىرلىقپەن قارايتىن جانە قوعام الدىنداعى جاۋاپكەرشىلىگىن سەزىنەتىن بەلسەندى جاستاردى تاربيەلەۋ، – دەدى ول.
ءىس-شارانىڭ نەگىزگى يدەياسى – ەكولوگيالىق مادەنيەتتىڭ ءسوز جۇزىندە ەمەس، ناقتى ىسپەن قالىپتاساتىنىن جاستارعا جەتكىزۋ. تابيعاتتى قورعاۋ – ءاربىر ازاماتتىڭ ورتاق مىندەتى، ال تازا بولاشاق بۇگىنگى ۇرپاقتىڭ سانالى تاڭداۋىنا بايلانىستى.
