اقتوبە وبلىسىندا ايەلدەر كاسىپكەرلىگىن قولداۋعا جانە الەۋمەتتىك ينفراقۇرىلىمدى دامىتۋعا باعىتتالعان «KözI’m» تالىمگەرلىك جوباسىنىڭ ارالىق قورىتىندىلارى شىعارىلدى.
ايەلدەردىڭ ەكونوميكالىق دەربەستىگى نەگە ءوڭىر ەكونوميكاسىن نىعايتۋدىڭ نەگىزگى فاكتورىنا اينالىپ وتىرعانى تۋرالى جوبا باستاماشىسى، «اتامەكەن» ۇكپ ىسكەر ايەلدەر كەڭەسىنىڭ اقتوبە وڭىرلىك كەڭەسىنىڭ ءتورايىمى، وبلىستىق ءماسليحات دەپۋتاتى ءارى بەلگىلى كاسىپكەر-مەتسەنات كۇلپارشىن ايدارحانوۆا ايتىپ بەردى.
«KözI’m جوباسى ەڭ الدىمەن تاجىريبەلىك قۇرال رەتىندە ويلاستىرىلدى. وسى ۋاقىت ىشىندە ءار قاتىسۋشىنىڭ العا جىلجىعانىن كورىپ، قۋانامىز. ءبىرى باستاپقى بيزنەس-يدەياسىن جەتىلدىرسە، ەندى ءبىرى ءوز بيزنەسىندەگى ۇدەرىستەردى وڭتايلاندىردى. ءاربىر جەتىستىكتىڭ ارتىندا دامۋعا جانە وتباسىنىڭ قارجىلىق تۇراقتىلىعىن نىعايتۋعا دەگەن ۇمتىلىس جاتىر. ءبىز كاسىپكەرلەردىڭ كۇندەلىكتى ماسەلەلەرىن تالقىلاپ قانا قويماي، زاڭناماداعى وزگەرىستەر، قارجىلىق ساۋاتتىلىق جانە قۇقىقتىق قاۋىپسىزدىك ماسەلەلەرى بويىنشا تۇراقتى تۇردە ساراپتامالىق كەزدەسۋلەر وتكىزەمىز»، – دەيدى كۇلپارشىن ايدارحانوۆا.
الايدا سپيكەردىڭ ايتۋىنشا، ايەلدەر كاسىپكەرلىگىن قولداۋ جالپى الەۋمەتتىك كۇن تارتىبىنەن بولەك قاراستىرىلماۋى ءتيىس. بۇگىنگى نەگىزگى ماسەلە ايەلدەردىڭ ەڭبەك ەتۋگە دەگەن ىنتاسىنىڭ جوقتىعىندا ەمەس، ينفراقۇرىلىمدىق كەدەرگىلەردە.
«بيزنەس-مەنتور رەتىندە مەن ەرەكشە قاجەتتىلىگى بار بالالاردى تاربيەلەپ وتىرعان انالارمەن دە، شالعاي اۋىلداردىڭ تۇرعىندارىمەن دە كەزدەسەمىن. ولاردىڭ ارقايسىسى ءوزىن جۇزەگە اسىرۋعا ۇمتىلادى. بىراق بالاباقشاداعى ورىن تاپشىلىعى، قايتا دايارلاۋ مۇمكىندىكتەرىنىڭ شەكتەۋلىلىگى نەمەسە بالاسىن بىرنەشە ساعاتقا قالدىراتىن جاعدايدىڭ جوقتىعى سياقتى كەدەرگىلەرگە تاپ بولادى. سوندىقتان ەكونوميكالىق تاۋەلسىزدىك دەگەنىمىز – ەڭ الدىمەن ءاربىر ايەلدىڭ الەۋەتىن تولىق جۇزەگە اسىرۋىنا جاعداي جاساۋ»، – دەيدى كۇلپارشىن ايدارحانوۆا.
تەڭ مۇمكىندىكتەر قاعيداتىنا نەگىزدەلگەن قوعام قۇرۋ ءۇشىن ساپالى ءبىلىمنىڭ قولجەتىمدىلىگى، قايتا دايارلاۋ باعدارلامالارى، ەڭبەكاقىسى اشىق ءارى ءادىل تولەنەتىن جۇمىس ورىندارىن كوبەيتۋ جانە بالاباقشالار جەلىسىن كەڭەيتۋ قاجەت. بۇل – ەل ەكونوميكاسىنا سالىناتىن تىكەلەي ينۆەستيتسيا.
«ەكونوميكالىق تاۋەلسىزدىك ايەل ەڭبەگىنىڭ لايىقتى باعالانىپ، ونىڭ ءبىلىمى مەن تاجىريبەسىنىڭ سۇرانىسقا يە بولۋىنان باستالادى. وتباسى مەن مانساپتى قاتار الىپ جۇرۋگە مۇمكىندىك جاسالعان كەزدە بۇكىل قوعام ۇتادى. ويتكەنى ەڭبەك ەتىپ جۇرگەن ايەل وتباسىنىڭ ءال-اۋقاتىن ارتتىرادى، ونىڭ كاسىبى وڭىردە جاڭا جۇمىس ورىندارىن اشادى، ال كاسىبي دامۋى ەلدىڭ ادامي كاپيتالىن نىعايتادى. ايەلدەردىڭ بەلسەندى قاتىسۋىنسىز قۋاتتى ەكونوميكا قۇرۋ مۇمكىن ەمەس»، – دەپ تۇيىندەدى كۇلپارشىن ايدارحانوۆا.
